ԱԺ Եվրաինտեգրման մշտական հանձնաժողովն այսօր դրական եզրակացություն տվեց Հայաստանի և Էստոնիայի կառավարության միջև «Հայաստանի Հանրապետության և Եվրոպական միության միջև` առանց թույլտվության բնակվող անձանց հետընդունման (ռեադմիսիայի) մասին» համաձայնագրի կիրարկման մասին արձանագրությունը վավերացնելու մասին նախագծին:
Միգրացիոն պետական ծառայության պետ Գագիկ Եգանյանի տեղեկացմամբ, այն կնքվել է 2013 թվականին: «Համաձայնագիրը կարգավորում է, թե ովքեր են իրավասու մարմինները, որ մարմինը որ մարմնի հետ պետք է ուղղակիորեն առնչվի, ովքեր են կոնտակտային անձինք, դրանց հասցեները, ինչ սահմանակետերով պետք է անձի վերադարձը կազմակերպվի, քաղաքացիության ապացուցման միջոցները, փաստաթղթերի տեսակները, հետընդունման ձևերը արագացված ընթացակարգի պայմաններում և այլն», -ներկայացրեց Գագիկ Եգանյանը:
Մի քանի ամիս առաջ նման համաձայնագիր հաստատվել է նաեւ Ֆրանսիայի կառավարության հետ: «Արդյունավետ կիրարկման դեպքում մենք կարող ենք հավակնություններ ունենալ միգրացիոն հարցերով ավելի լայն եւ խորացված համագործակցության, այդ թվում՝ վիզաների ազատականացման հարցերի շուրջ: Առանց նմանատիպ հարցերով համագործակցության, ակնկալել, որ կարող ենք ունենալ վիզաների ազատականացում, այդքան էլ ճիշտ չէ, որովհետեւ սա նույն մեդալի երկու հակառակ կողմերն են»,- ասաց Գագիկ Եգանյանը:
Նելլի ԳՐԻԳՈՐՅԱՆ
