«Տնտեսական համագործակցության հիմքը ճանապարհն է: Այն խափանվում է պարբերաբար»,- այսօր «Ելք» խմբակցության կազմակերպած ԵԱՏՄ պայմանագրի գործողությունը դադարեցնելու գործընթաց սկսելու ԱԺ որոշման նախագծի վերաբերյալ խորհրդարանական լսումների ժամանակ ասաց իրավապաշտպան, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
Նա խոսեց ՀՀ-ում եւ հարեւան երկրներում իշխանության շարունակականության մասին. Ադրբեջանում, գիտենք, իշխանությունը փոխանցվում է ինտիմ ճանապարհով, մենք դեռ այդտեղ չենք հասել, վարչապետից նախագահ փոխելով են փոխանցում:
Նա նշեց, որ ԵԱՏՄ անդամ Բելառուսում դեռ մահապատիժը, որպես պատժի տեսակ, չեն վերացրել, դեռ խոսակցություն կա, որ ՌԴ-ում էլ ուզում են վերականգնել. «Բելառուսում ի՞նչ ընտրություններ, դրանք ուղղակի միջոցառում են: Մեր մոտ էլ է միջոցառում: Այս անդամ պետություններին բնորոշ է համակարգային անպատժելիությունը, բացարձակապես անհաշվետվողականությունը, անպատասխանատվությունը՝ սեփական երկրի քաղաքացիների հանդեպ: Եթե լիներ պատասխանատվություն՝ կլիներ ամոթի զգացում, որ իրար հերթականությամբ պրեզիդենտ ու պրեմիեր մինիստր չէին փոխի: Քիչ թե շատ Ղրղըզստանն է իրեն ճիշտ պահում, ավելի շատ պահանջներ է ներկայացնում, մենք այդ պահանջներն էլ չենք ներկայացնում»:
Նա հարց ուղղեց՝ ո՞վ է նախաձեռնել ԵԱՏՄ-ն եւ ո՞րն է նախաձեռնության նպատակը, պարզ է՝ ակնհայտ բռնապետական իշխանության տարածումն է՝ հետխորհրդային երկրների վրա:
Ըստ նրա, չի կարող ապագա լինել մի տեղ, որտեղ ամեն ինչ որոշվում է մեկ անձի կողմից, մեկ անձի որոշմամբ է ստեղծվել եւ ինքն էլ որոշումները կայացում է, երկու աթոռների վրա միաժամանակ նստել էլ հնարավոր չէ. «Նստողները թող այդ նստելու ձգտումները մեր վրա չտարածեն»:
«Իրազեկ քաղաքացիների միավորում» ՀԿ համակարգող Դանիել Իոաննիսյանն էլ անդրադարձավ ապրանքների ներմուծման մաքսատուրքերի բարձրացմանը: Նա ասաց, որ եթե առաջ ներմուծման մաքսատուրքերը 3 տոկոս էին, հիմա ԵՏՄ-ին անդամակցելով՝ 8 տոկոս: Ներմուծման մեջ ԵԱՏՄ չափաբաժինը պակասեց, դա լրացուցիչ գնաճի հանգեցրեց: ԵԱՏՄ անդամ երկրների հետ իրականացնում ենք մեր արտաքին առեւտրի 25 տոկոսը, մյուս 75 տոկոսը կարող է տուժել, ավելանալու են մաքսային դրույքաչափերը: Եթե Հայաստանը շարունակի իր անդամակցությունը ԵԱՏՄ-ին, ապա 2020-ից 7 տարուց ավելի հին ավտոմեքենաների մաքսազերծելիս ավելի թանկ կվճարեն: Օրինակ, 1,6 լիտր աշխատանքային ծավալով շարժիչով «Օփելի» մաքսազերծումը կարժենա 2500 եվրո, իսկ 2 լիտր շարժիչովինը՝ 4400 եվրո՝ առանց ԱԱՀ-ի եւ բնօգտագործման հարկի:
Իոաննիսյանն ասաց, որ բնակչության 90 տոկոսը հին մեքենաներ է գնում, ավելի նոր մեքենաներ գնելու հնարավորություն չունի: Իսկ հին մեքենաներ մաքսազերծելի, եթե հիմա 1000 եվրո էին վճարում, 2 տարի հետո նույն մեքենայի մաքսազերծման համար վճարելու են 3500-6000 եվրո՝ ներառյալ ԱԱՀ-ն եւ բնօգտագործման վճարը: Քանի որ հանրային մարմինները ՀՀ-ում շատ են մեքենաներ գնում, սա լրացուցիչ բեռ է լինելու նաեւ պետբյուջեի վրա:
Հռիփսիմե ՋԵԲԵՋՅԱՆ
