«ՀՀ-ԵՄ ստորագրված պայմանագրի հետ կապված ասվում է՝ տեսաք, որ եւ-եւ-ը մենք արեցինք: Ամենայն պատասխանատվությամբ ես ասում եմ՝ որեւէ եւ-եւ տեղի չի ունեցել: Դա կարող էր տեղի ունենալ, եթե ՀՀ-ն, ԵԱՏՄ անդամ լինելով՝ ստորագրեր խորը եւ համապարփակ ասոցացման համաձայնագիր, 500 մլն-անոց շուկա նաեւ մուտքի հնարավորության ստանար: Եվ-եւ տեղի չի ունեցել: Դա եւ-եւ-ը չի, ասոցացումը չի»,- այսօր «Ելք» խմբակցության հրավիրած խորհրդարանական լսումների ժամանակ ասաց «Ելք» խմբակցության պատգամավոր Էդմոն Մարուքյանը:
Հիշեցնենք, որ ԱԺ-ում քննարկվում է ԵԱՏՄ-ին ՀՀ անդամակցությունը դադարեցնելու գործընթացի վերաբերյալ ԱԺ որոշման նախագիծը: Նա նշեց, որ տնտեսությունը զարգացնելու համալիր պետք է դուրս գա ԵԱՏՄ-ից, Ասոցացման համաձայնագրի մաս դառնա, ինչպես մեր հարեւան Վրաստանը, եւ սկսի տնտեսության ինտեգրումը եվրոպական տնտեսությանը. «Դրա արդյունքում ՀՀ տնտեսությունը կզարգանա, նաեւ մեր անվտանգության խնդիրը կլուծենք: Մենք չենք կարող անընդհատ վարկով զենք գնել: Տնտեսությունը չզարգացնելու հետեւանքով չենք կարողանալու այդ վարկերն էլ փակել»:
ԱԺ արտաքին հարաբերությունների հանձնաժողովի նախագահ Արմեն Աշոտյանը «Ելքի» նախաձեռնության հետ կապված ասաց, որ նախաձեռնության տակ կա քաղաքականություն. «Քաղաքական փաստարկների մասին խոսենք: Մեզ համար ամենակարեւոր քաղաքական հարցը արցախյան հարցն է, մեջբերեցին, որ ԵԱՏՄ անդամներից ոչ բոլորն են հայանպաստ քվեարկություն արել: Այո, ոչ բոլորն են, մենք գիտենք եւ Բելառուսի եւ Ղազախստանի հայտարարությունները, բայց հիշենք, որ ԵԱՏՄ-ն նախեւառաջ ստեղծվել է ՌԴ-ի նախաձեռնությամբ եւ ռուսական տնտեսության շուրջ: Արցախյան հակամարտության կարգավորման դերակատարներից մեկը ՌԴ-ն է, որպես Մինսկի խմբի համանախագահ նաեւ»:
Նա հիշեցրեց Լավրովի հայտարարությունները ՀՀ-ում եւ Բաքվում: Ըստ նրա, կապել ԵԱՏՄ-ից դուրս գալու նախաձեռնությունը արցախյան հակամարտության հետ այնքան էլ ճիշտ չէ: Այն փաստարկին, որ դառնալով ԵԱՏՄ անդամ, մենք կորցրել ենք այլ երկրների հետ համագործակցելու հնարավորությունները՝ Աշոտյանն ասաց, որ պետք չէ խորամանկել, պարզ է, որ ցանկացած տնտեսական միավորում իր ներսում ունի քաղաքական հարց: Աշոտյանն ասաց, որ այո, դոլարային համարժեքով ՀՀ ՀՆԱ-ն ընկել է, դա դոլարային փոխարժեքի խնդիր է, ոչ թե ԵԱՏՄ-ին անդամակցելու: Մոլդովայի ՀՆԱ-ն էլ է ընկել:
Արմեն Աշոտյանը նաեւ ընդգծեց, որ ԵՄ-ն, որը 60 տարվա պատմություն ունի, դեռ հղկում է իր ինստիտուտները, կայացնում է, ուստի ակնհայտ է, որ ԵԱՏՄ-ն էլ դեռ 2.5 տարվա մեջ պետք է այս դժվարությունները հաղթահարի: Խնդիրներ, իհարկե, կան ԵՄ-ում էլ, ԵՏՄ-ում էլ:
Ինչ վերաբերում է ռազմական բաղադրիչին, Արմեն Աշոտյանն ասաց, որ իհարկե, մենք բոլոր մակարդակներում Ադրբեջանին ՌԴ-ի կողմից զենք վաճառելու հարցը բարձրացրել ենք: Բայց եթե այս փաստարկը «Ելքը» բերեր ու ասեր՝ եկեք ՀԱՊԿ-ից դուրս գանք, էլի ընկալելի կլիներ, տրամաբանական կլիներ. «Ռազմաքաղաքական փաստարկը բերել տնտեսական միավորումից դուրս գալու համար, կարծում եմ, ճիշտ չէ»:
Ինչ վերաբերում է դեպորտացիային, Աշոտյանը պատասխանեց, որ այդ գործընթացը կա բոլոր քաղաքակիրթ պետություններում էլ: Մենք ռեադմիսիայի պայմանագիր ենք ստորագրել եւ Եվրոպայից էլ մեր հազարավոր քաղաքացիների հանելու են. «Սա փաստարկ չէ, որ մի տեղից մեզ հանելու են, այնտեղից չեն հանելու: Այնտեղից էլ են հանելու: Ավելին ասեմ՝ վիզաների ազատականացման գործընթացով 60 հազար ուկրաինացի, 20 հազար վրացի այս պահին խախտել է վիզայի ազատականացման պայմանները եւ հիմա ձեր ասած՝ դեպորտի տակ են: Սրանք թվեր են, փաստարկ է: Իսկ եւ-եւ-ը իրականացել է: Դրա տակ նախեւաառաջ աշխարհաքաղաքական հանգամանքն է»:
Փաշինյանն Աշոտյանի ելույթից հետո արձագանքեց, որ ՀՀԿ-ն պրո-ղազախական դիրքորոշում է որդեգրել, ըստ ամենայնի:
Հռիփսիմե ՋԵԲԵՋՅԱՆ
