Թուրքիայի նախագահ Ռեջեփ Թայիփ Էրդողանը հայտարարել է՝ հրաժարական կտա, եթե երկրի գլխավոր ընդդիմադիր «Ժողովրդահանրապետական» կուսակցության առաջնորդ Քեմալ Քըլըչդարօղլուն ապացուցի, որ նախագահը կոռուպցիոն գործունեություն է ծավալում: Այս մասին Էրդողանն ասել է NTV-ի հեռուստաեթերում:
Քըլըչդարօղլուն քննադատել էր այն փաստը, որ իշխանությունները փորձում են թաքցնել երկրի վարչապետ Բինալի Յըլդըրըմի որդու՝ օֆշորային հաշիվներ ունենալու հանգամանքը: Նա Էրդողանին կոչ է արել հրապարակել սեփական ունեցվածքի մասին տվյալներ: «Էրդողանի երեխաները, հարազատներն ու մերձավորները մի քանի միլիոն դոլար են ներդրել օֆշորային ընկերությունում»,-ասել է ընդդիմադիր առաջնորդը:
Էրդողանի հանձնարարականով մի խումբ փաստաբաններ դատի են տվել Քըլըչդարօղլուին՝ պահանջելով նախագահին վճարել 380 հազար դոլար: «Բերեք փաստեր, իսկ եթե դրանք չկան, ներողություն խնդրեք: Ապացուցեք, թե որ օտարերկրյա բանկում ես հաշիվ ունեմ, իսկ եթե չեք կարող, հեռացեք քաղաքականությունից»,-իր հարցազրույցում Քեմալ Քըլըչդարօղլուին նման կոչ է հղել Էրդողանը:
Լուիզա ՍՈՒՔԻԱՍՅԱՆ
