Հայաստանի և Ադրբեջանի հետ Եվրամիության պայմանագրերը զգալի փոխոխությունների չեն հանգեցնի, քանի որ այդ երկրներում մեծ է Ռուսաստանի ազդեցությունը: Այս մասին հայտարարել է Գերմանիայի կանցլեր Անգելա Մերկելը Բրյուսելում Արևելյան գործընկերության գագաթնաժողովից առաջ, հաղորդում է Deutsche Welle-ն:
Մերկելի խոսքով՝ կարևոր է, որպեսզի ԵՄ-ը ասոցացման գործող համաձայնագրեր ունենա Վրաստանի Ուկրաինայի և Մոլդովայի հետ: Միաժամանակ, նա ընդգծել է, որ նմանատիպ համաձայնագրեր նախատեսվում են նաև Հայաստանի և Ադրբեջանի հետ, որոնք, սակայն, «կտրուկ փոփոխությունների» չեն հանգեցնի:
«Այդ երկրներում Ռուսաստանի հետ հարաբերությունները կենտրոնական դեր ունեն»,- ասել է կանցլերը:
Մերկելը նաև նշել է, որ Եվրոպայի արևելյան երկրների հետ հարաբերությունները կարևոր նշանակություն ունեն Եվրամիության անվտանգության համար:
Պատրաստեց Վիկտորյա ԱՆԴՐԵԱՍՅԱՆԸ
