Բրյուսելում իր աշխատանքներն է սկսում Արեւելյան գործընկերության գագաթնաժողովը, որի շրջանակում նախատեսվում է Հայաստանի հետ ստորագրել Համապարփակ և ընդլայնված գործընկերության համաձայնագիրը: Հայաստանի եռագույն դրոշը մասնակիցների դրոշների շարքում է՝ Եվրոպական միության դրոշից անմիջապես հետո, ըստ այբբենական հերթականության:
Այս պահին ժամանում են գագաթնաժողովի մասնակիցները՝ տարբեր երկրների ղեկավարներ: Նրանցից շատերը մոտենում են հավաքված լրագրողներին ու կարճ իրենց ուղերձը փոխանցում ակնկալիքների վերաբերյալ կամ պատասխանում խնդրահարույց հարցերին: Բելառուսի ԱԳ նախարար Վլադիմիր Մակեյն, ասենք, մասնավորապես բացատրություններ ներկայացրեց, թե ինչու գագաթնաժողովին չի մասնակցում Ալեքսանդր Լուկաշենկոն:
Ոչ Հայաստանի նախագահը, ոչ էլ Ադրբեջանի նախագահը չմոտեցան լրագրողներին: Իլհամ Ալիեւը ուղղակի ձեռքը թափահարելով ողջունեց: Իսկ Սերժ Սարգսյանը լրագրողներից մեկի հարցին, թե ինչ սպասումներ ունի գագաթնաժողովից՝ պատասխանեց. «Ավելի ուշ»:
Աննա ԻՍՐԱՅԵԼՅԱՆ
Բրյուսել
