Վրաստանի Գյոթեի ինստիտուտի PASCH ծրագիրը օրերս «Այբ» դպրոցում համախմբել է Երևանի, Ճամբարակի, Կախաթիի և Քութաիսիի դպրոցների շուրջ քառասուն աշակերտի: Դեռևս անցյալ տարի Վրաստանում սկսած նախագիծը, որը կոչվում էր «Պարը դպրոցում» նպատակ ուներ միացնելու տարբեր երկրների՝ Հայաստանի, Ռուսաստանի, Վրաստանի և Ադրբեջանի աշակերտներին: Քանի որ ծրագիրը հաջողվեց որոշեցին այս տարի անցկացնել Հայաստանում: Ծրագրի շրջանակում Վրաստանի Գյոթեի ինստիտուտը համագործակցում է «TanzZeit» գերմանական համույթի հետ, որոնք երեխաներին չորս օրվա ընթացքում սովորեցրել են գերմաներեն՝ պարային շարժումների միջոցով:
Հայաստանում դասավանդման փորձագետ Դանա Շլուխթմանը խոսելով ծրագրի մասին ընդգծեց. « Ծրագիրը հնարավորություն է տալիս մասնակիցներին նախ սովորել լեզուն , ապա լեզվի իմացության մակարդակի վկայական ստանալ Վրաստանի Գյոթեի ինստիտուտի կողմից նաև մի շարք այլ ծրագրերի մասնակցության հնարավորություն ստանալ»:
«TanzZeit» Համույթի պարուսույցները օգտագործելով մասնակիցների գաղափարները մեկ ընդհանուր բեմադրություն են ստեղծել: Համույթի պարուսույցներից Աննը նշեց, որ ծրագրի գլխավոր նպատակն էր ցույց տալ, թե ինչպես կարելի է շարժումներով սովորել լեզուն. « Մենք հավատացած ենք, որ սովորելու զգացմունքային կողմը շատ կարևոր է, մենք մեզ ընդունում ենք որպես ուսուցման պրոցեսի դեսպաններ: Ուրախ ենք, որ Գյոթեի ինստիտուտի և «Այբ» դպրոցի շնորհիվ հնարավորություն ունեցանք ծանոթանալ և աշխատել այսքան հիանալի երեխաների հետ: Չորս օր առաջ նրանք չգիտեին իրար, բայց այնքան համարձակ գտնվեցին, որ կարողացան իրենց բոլոր մտքերն ու գաղափարներն այստեղ ներկայացնել: Թեև նրանք երկու տարբեր պետություններից են և չորս տարբեր քաղաքներից, բայց միասին կարողացան մի ամբողջ ծրագիր ներկայացնել: Պատահական չէ նաև ծրագրի խորագիրը. «Մենք յուրաքանչյուրս տարբեր ենք, բայց բոլորս նույնն ենք »»:
Մասնակիցներից Մարիա Աղաբեկյանը, որը «Այբ»-ի աշակերտներից է, նշեց որ գերմաներեն իմացող մասնակիցները վիճակագրությամբ են ընտրվել, քանի որ մասնակցել ցանկացողների թիվը մեծ էր:
«Ծրագրի ընթացքում և՛ աշակերտների, և՛ պարուսույցների հետ հասցրել ենք ընկերանալ: Շատ հետաքրքիր էր, նախ նոր ընկերներ ձեռք բերեցինք, ապա լեզուն զարգացրեցինք, նոր պարային շարժումներ սովորեցինք: Միմյանց նաև ազգային պարեր սովորեցրինք»,-հավելեց նա:
PASCH նախաձեռնությունը ստեղծվել է 2008թ-ին գերմանական դպրոցները արտասահմանյան դպրոցներին միավորելու նպատակով: Նախաձեռնության անդամ են տարբեր երկրների 1800 դպրոցներ: «Այբ» դպրոցը PASCH-ի անդամ է 2016թ-ից:
Նանե ՊԵՏՐՈՍՅԱՆ
