2016թ. ՀՀ ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամներից Արմեն Լամբարյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Վարդգես Գեւորգյանի, Մանվել Աթոյանի, Աշոտ Պետրոսյանի, նաեւ՝ Կարո Եղնուկյանի եւ Խաչատուր Գիչյանի գործով հերթական դատական նիստում այսօր ամբաստանյալներից Վարդգես Գեւորգյանի շահերի պաշտպան, փաստաբան Կարեն Մեժլումյանը ներկայացրեց վերջինիս կալանքը փոխելու եւ գրավով ազատ արձակելու միջնորդություն՝ վստահեցնելով, որ գտնվելով ազատության մեջ՝ Գեւորգյանը չի խոչընդոտի դատաքննությանը: Մեղադրող դատախազներ Պետրոս Պետրոսյանն ու Արթուր Չախոյանը միջնորդության դեմ առարկեցին՝ նշելով, որ կալանավորման հիմքերն առկա են: Վերադառնալով խորհրդակցական սենյակից՝ դատավոր Արտուշ Գաբրիելյանը որոշեց միջնորդությունը մերժել:
«Դուք ապացուցեցիք իմ՝ ռազմագերու կարգավիճակում լինելը… ես ապստամբություն եմ արել»,-լսելով որոշումը՝ հայտարարեց Վարդգես Գեւորգյանը: Դատավոր Արտուշ Գաբրիելյանն էլ հիշեցրեց, որ պետք է հարգել օրենքը. «Եթե անձը դատարանում է, ուրեմն՝ ամբաստանյալի կարգավիճակում է: Մի նեղացեք, դա վիրավորական բառ չէ: Ապստամբություն եք արել, թե ինչ, դատաքննության վերջում կպարզվի»:
Ամբաստանյալներից Արմեն Լամբարյանն էլ հանդես եկավ հայտարարությամբ. «Ամբաստանյալները ոչ թե մենք ենք, այլ քննչական մարմիններն են ու մեղադրող կողմը, որոնք անգործության են մատնված»: Դատավոր Արտուշ Գաբրիելյանը հորդորեց հարգալից լինել կողմերի նկատմամբ: «Այս դահլիճում բոլորն անմեղ են, քանի դեռ դատաքննությունը չի ավարտվել»,-ասաց նա:
Լուիզա ՍՈՒՔԻԱՍՅԱՆ
