Հայաստանի հասարակությունը բավականին իներտ է դարձել, մասնավորաբար, անտարաբեր են ՀՀ-ԵՄ համաձայնագրի ստորագրման նկատմամբ: Այս կարծիքին է ԱԺ մարդու իրավունքների պաշտպանության մշտական հանձնաժողովի նախկին նախագահ, «Համախմբում» կուսակցության անդամ Էլինար Վարդանյանը: Հիշեցնենք, Արեւելյան գործընկերության գագաթաժողովը կայանալու է վաղը, Բրյուսելում: Նախատեսվում է ՀՀ-ԵՄ նոր համաձայնագրի ստորագրում: Փաստաթղթի ստորագրումից մեկ օր առաջ Ֆրիդրիխ Նաումանի ու «Գլոբալիզացիայի եւ տարածաշրջանային համագործակցության վերլուծական կենտրոնը» քննարկում էին կազմակերպել:
«Փաստաթուղթը ստորագրելու նախաշեմին ենք, բայց դեռ քննարկում ենք՝ ստորագրելո՞ւ ենք, թե՞ ոչ: Վաղը կտեսնենք՝ ի՞նչ կլինի, բայց դրանից հետո շունչներս պահած պետք է սպասենք տեսնենք՝ ինչպե՞ս է այն իրագործվելու, կյանքի կոչվելո՞ւ է, թե՞ լինելու է հերթական փաստաթղթերից մեկը, որին պարտադրված միանում ենք, բայց չենք իրականացնում»,- ասաց Էլինար Վարդանյանը:
Նախկին պատգամավորն այս փաստաթղթից առանձնացնում է հասարակության համար կարեւոր երկու հարցեր`սոցիալական ոլորտի եւ աշխատաշուկային վերաբերվող: «Աշխատանքի միջազգային կազմակերպության կողմից ընդունված եզրույթի մասին այստեղ խոսք կա՝ արժանապատիվ աշխատանքի եզրույթի մասին է խոսքը, իսկ դուք գիտեք, որ Հայաստանում աշխատողների իրավունքների պաշտպանության լրջագույն խնդիր կա, որոնց գոնե ընտրությունից ընտրություն առնչվում ենք: Եթե իրականում կիրառվեն այն ստանդարտները, որոնք նախատեսված են այս բանաձևերով՝ հնարավորություն կտրվի հիմք դնելու արժանապատիվ աշխատանք ունենալուն»,- ասաց Էլինար Վարդանյանը` նկատելով, որ առանձին դեպքերում գործատուներն իրենց աշխատողներին վերաբերվում են որպես ստրուկների:
Մանրամասները` տեսանյութում:
Նելլի ԳՐԻԳՈՐՅԱՆ
