Եթե 2013-ի սեպտեմբերի 3-ի տապալումը չլիներ, այսքան շունչներս պահած չէինք սպասի, չէինք մտածի՝ կստորագրվի՞ համաձայնագիրը, չի՞ ստորագրվի: Այսօր Ֆրիդրիխ Նաումանի ու «Գլոբալիզացիայի եւ տարածաշրջանային համագործակցության վերլուծական կենտրոնի» կազմակերպված քննարկման ժամանակ ասաց Եվրոպական ուսումնասիրությունների կենտրոնի ղեկավար Արթուր Ղազինյանը: Իրականում, ըստ նրա, սա սովորական միջազգային իրավական ընթացակարգ է:
Հիշեցնենք` վաղը Բրյուսելում կայանալու է արեւելյան գործընկերության գագաթաժողովը, որտեղ սպասվում է ՀՀ-ԵՄ նոր համաձայնագրի ստորագրումը: Թե ՀՀ-ի, թե ԵՄ-ի պաշտոնյաները հայտարարել են`համաձայնագիրը ստորագրվելու է: Եթե վաղը համաձայնագիրը ստորագրվի, բանախոսն ասում է`Հայաստանը կօգտագործի իր սուվերեն պետությանը հարիր գործիքներից մեկը:
Ինքը չի համեմատում այս համաձայնագիրը Ասոցացման պայմանագրի հետ: Սխալ է համարում: Փաստում է`Ասոցացման համաձայնագրում նախատեսվում էին կոնկրետ գործիքներ, որոնց շնորհիվ բարձրացնելու էինք Հայաստանում տրամադրվող ծառայությունների, ապրանքների որակը, համապատասխանեցնելու էինք դրանք ԵՄ պահանջներին, զրոյական մաքսատուրքերով արտահանելու էինք դրանք ԵՄ եւ ստանալու եվրոպական ապրանքներ` առանց մաքսատուրքերի: Ու սա ուղեկցվում էր քաղաքական ասոցացման համաձայնագրի դրույթներով: Այժմ, ի նկատի ունենալով ՀՀ-ի պարտավորությունները ԵԱՏՄ-ի շրջանակներում, շատ դրույթներ կրճատվել են: Մասնավորաբար, չկան պարտավորություններ եւ պատասխանատվություն`համաձայնագրի դրույթները չկատարելու համար. ոչ քաղաքական, ոչ էլ իրավական: Կատարումը թողնված է կողմերի կամքին:
«Ամեն ինչ մեզնից է կախված: Ամեն ինչ ավելի քան հստակ է: Կան գործիքներ, կա տեսլական, թե որքանով կկատարվի փաստաթուղթը՝ կախված է մեզնից: Ձեռք բերված պայմանավորվածություններն իրականացնելու համար հարկավոր է քաղաքական ու հասարակական աջակցություն, որոնք պետք է ինչ-որ կերպ ճնշում գործադրեն: Ես կասկածամիտ եմ, սակայն, այս հարցում, որովհետև մեր խորհրդարանականներին այդքան էլ չի հետաքրքրում համաձայնագիրը»,-ասաց նա`հավելելով. «Կճնշենք բարեփոխումները կիրականան, չենք ճնշի չեն իրականանա: Հակառակ դեպքում` թուղթ սևացնելով` մեր կյանքը չի լավանա»:
Նա անդրադարձավ նաեւ ՌԴ-ում առկա այն հիստերիային, որ ՀԱԷԿ-ի վերաբերյալ համաձայնագրում առկա դրույթը`համապատասխանեցում եվրոպական ստանդարտներին, կարող է Եվրամիության համար գործիք դառնալ Հայաստանում էներգետիկ այլընտրանք ստեղծելու համար: Մանրամասները` տեսանյութում:
Նելլի ԳՐԻԳՈՐՅԱՆ
