Տարկետման իրավունքի սահմանափակման դեմ բողոքող «Հանուն գիտության զարգացման» նախաձեռնության անդամների հանդիպումը ԱԺ պատգամավորների, ՊՆ փոխնախարարի եւ ԿԳ նախարարի հետ շարունակվում է:
Ինչպես տեղեկացրել ենք, երիտասարդները առաջարկություններ ներկայացրեցին հանդիպմանը: ՊՆ փոխնախարար Արտակ Զաքարյանը ասաց, որ ուսնաողները «պետք է»-ով չխոսեն. «Մենք էլ չգիտենք, թե որն է պետք անել եւ որն է ճիշտը: Բայց չստացվի այնպես, որ մենք հավաքվել ենք, որ ձեր հանձնարարությունները կատարենք»:
Նա ասաց` կարծես թե ուսանողները նորից առաջարկում են տարկետման իրավունքը սկզբում տալ, բայց իրենք այլ բան են ուզում: Լայն իրավունք չպետք է տալ բոլորին. «Ունե՞ք մոտավոր շրջանակ, թե հատկապես ո՞ր երիտասարդներին է վերաբերվում ձեր առաջարկը»:
Դավիթ Պետրոսյանը պատասխանեց, որ «Պատիվ ունեմ», «Ես եմ» ծրագրերին զուգահեռ են առաջարկում իրենց առաջարկն իրականացնել: Թիվը կարելի է քննարկել, բայց սրանից կարող են օգտվել այն ուսանողները, որոնք ցանկություն կհայտնեն: Տարկետում ստանալը եղել է մոտիվացիա՝ լավ սովորելու:
Ուսանողները հիշեցրին ՊՆ նախարար Վիգեն Սարգսյանի խոսքը, որ բանակը սրանով համալրելու խնդիր չեն դնում, քանի որ բանակում այդ 140 հոգին խնդիր չեն լուծում: Ըստ ուսանողների, գիտության մեջ այդ 140 հոգին խնդիր լուծում են: Նրանց գիտությունից հանելով՝ գիտությունն ուղղակի վերանալու է:
Արտակ Զաքարյանն ուսանողների առաջարկության հետ կապված ասաց, որ դա խառնաշփոթ կառաջացնի, ըստ էության, ծառայության այլ տեսակ են առաջարկում, մինչդեռ «Պատիվ ունեմ», «Ես եմ» ծրագրերը արդեն կան: Ուսանողը կարող է ընտրել այդ ծրագրերը եւ դառնա արդեն պայմանագրային. «Մենք չենք ուզում նոր ծառայության մեխանիզմ ստեղծել, երբ «Պատիվ ունեմ»-ով դա կարգավորվում է: «Ես եմ»-ը ուսանողական դաշտից դուրս է»: Դավիթ Պետրոսյանն էլ ասաց, որ իրենց առաջարկը «Պատիվ ունեմ»-ից տարբերվում է, քանի որ այդ ծրագրով 4 տարի սովորելուց հետո 3 տարի պետք է ծառայություն անցնի սպան, այսպես կրթության անընդհատության սկզբունքը խախտվում է, իսկ իրենց առաջարկով հնարավորություն է տրվում ավելի շատ մարդկանց ներգրավել, նաեւ կրթությանը չվնասել:
Իսկ ԿԳ նախարար Լեւոն Մկրտչյանը պնդեց, որ անվճար տեղերով փորձեն խրախուսել իրենց ցանկացած ուղղության զարգացումը:
Հռիփսիմե ՋԵԲԵՋՅԱՆ
