«Շուկայում կան խաղալիքներ, որոնք պարունակում են ֆտալատներ, որոնք վնասակար են օրգանիզմի համար, կարող են լինել անդառնալի հետևանքներ»,-«Մեդիա կենտրոնում» հրավիրված քննարկմանը զգուշացրեց «Հայ կանայք հանուն առողջության եւ առողջ շրջակա միջավայր ՀԿ-ի գիտաշխատող Քնարիկ Գրիգորյանը: Նա տեղեկացրեց, որ հետազոտություն են իրականացրել ոչ թանկարժեք և ոչ բրենդային խաղալիքների շրջանում: Հետազոտվել են հինգ երկրների 16 խաղալիքներ՝ 5-ը չինական, 3-ը ռուսական, մեկը վիետնամական, երկուսն անհայտ ծագման: Տիկին Գրիգորյանը նշեց, որ դրանք բոլորն էլ պարունակել են ֆտալատներ. «Ֆտալատն ունի վնասակար ազդեցություն: Կարող է ախտահարել լյարդը, ենթաստամոքսային գեղձը, ազդել գլխուղեղի վրա: Այն ունի կուտակվելու հատկություն ճարպային հյուսվածքներում: Նման է կանանց հորմոններին, ուստի կարող է երիտասարդների մոտ կրծքագեղձի, արգանդի քաղցկեղ առաջացնել, հանգեցնել անպտղության: Եթե երեխան ֆտալատ պարունակող խաղալիք է դնում բերանը, կարող են առաջանալ անդառնալի երևույթներ, օրինակ՝ շաքարային դիաբետ»:
Քնարիկ Գրիգորյանը նշեց, որ 2016-ին 19 երկրներ եկան այն գիտակցության, որ ֆտալատները վտանգավոր են: Անգամ Չինաստանն է հրաժարվել ֆտալատների կիրառությունից:
ՀՀ Տնտեսական զարգացման և ներդրումների նախարարության Շուկայի վերահսկողության տեսչական մարմնի ղեկավարի տեղակալ Արթուր Մկրտչյանը հայտարարեց՝ խնդիրը շատ լուրջ է: Նա տեղեկացրեց, որ տեսչական մարմինը 2017-ի ապրիլից իրականացնում է ստուգումները. «2017-ին 17 տնտեսվարող սուբյեկտների մոտ և՛ արտադրող, և՛ ներմուծող, իրականացվել են ստուգումներ: 12-ում դրանք ավարտվել են: Այդ տնտեսվարողների մոտ հայտնաբերվել են խախտումներ ինչպես սերտիֆիկատների, այնպես էլ մակնշման հետ կապված»:
Պարոն Մկրտչյանը տեղեկացրեց, որ քիչ-քիչ կարգավորվում է ոլորտը. սերտիֆիկատների գրանցման գործընթացում 24 տոկոս աճ է գրանցվել: Խաղալիք գնելու համար ՝ըստ պարոն Մկրտչյանի անվտանգության երաշխիքը սերտիֆիկատի առկայություննե է. «Ավելի լավ է տասը խաղալիքի փոխարեն մեկը գնել, սերտիֆիկատ պահանջել, որը անվտանգ լինելու հիմք է»:
ՀՀ ԱՆ Հիվանդությունների վերահսկման և կանխարգելմանազգային կենտրոնի` աշխատանքի, հիգիենայի, ճառագայթային և քիմիական անվտանգության բաժնի պետ Հովսեփ Հովհաննիսյանը վստահեցրեց, որ ՀՀ-ում ՀՀ առողջապահության նախարարի հրամանով կարգավորվում է ոլորտը. կան նորմեր, որոնք սահմանում են չափորոշիչներ. «Այսօր արդեն իսկ ավարտին է մոտենում ֆտալատների արգելման որոշման հետ կապված գործընթացը, որը կմտնի ԵԱՏՄ կանոնակարգի մեջ: ԵԱՏՄ երկրներում ֆտալտների օգտագործումն արգելվում է»:
ԳԱԱ օրգանական և դեղագործական քիմիայի գիտատեխնոլոգիական կենտրոնի առաջատար գիտաշխատող Ստեփան Գրիգորյանը մանրամասներ հաղորդեց ֆտալատների ռիսկերի մասին. «Ֆտալատները վտանգավոր նյութեր են: Դրանք ունենք օրգանիզմում կուտակվելու հատկություն: Հատուկ կլանիչներ դեռ չկան, որ դրանք չեզոքացնեն օրգանիզմի մեջ»: Պարոն Գրիգորյանը խաղալիք գնելու համար գործնական խորհուրդներ տվեց. «Շատ հոտավետ խաղալիքները պարունակում են ֆտալատների մեծ քանակ: Խաղալիք գնելիս ուշադրություն պետք է դարձնել. շատ վառ գույնով խաղալիքները կարող են պարունակել հատուկ ներկանյութեր, որոնց մեջ պարունակվում է արճիճ»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
