«Սասնա ծռեր» զինված խմբի գործով առանձնացված 2-րդ մասով դատական նիստին այսօր դատախազներ Արթուր Չախոյանն ու Արամ Արամյանը դատարան լիազորագիր չներկայացրին, ինչի համար էլ պաշտպանական կողմը միջնորդեց նիստը հետաձգել՝ պնդելով, որ եթե նրանք այս գործով որպես դատախազներ ներգրավված չեն, ապա նիստը չի կարող շարունակվել: Դատախազ Արամյանն էլ հայտարարեց, որ օրենքով սահմանված կարգով իրենք լիազորված են պաշտպանելու մեղադրանքը, հետեւաբար միջնորդությունն անհիմն է:
«Մենք ամենաշատն ենք շահագրգռված, որպեսզի այս գործը շուտ քննվի: Մենք չենք էլ իմացել, որ դատախազները լիազորագիր չեն ներկայացրել դատարան, բայց դատական նիստերը կայացվել են, միգուցե սա բոլորիս մեղավորությունն է: Այս գործով քննվող երեք վարույթներով էլ դատախազները պետք է լիազորագիր ներկայացնեն եւ ներգրավվեն որպես մեղադրողներ: Դատական նիստը պետք է հետաձգվի, հնարավորություն տրվի նրանց, որպեսզի լիազորագիր ներկայացնեն»,-ասաց փաստաբան Լուսինե Սահակյանը:
Պաշտպաններից Լիպարիտ Սիմոնյանն էլ դատախազներին բացարկի միջնորդություն ներկայացրեց, դատարանը հեռացավ խորհրդակցական սենյակ որոշում կայացնելու:
Արփինե ՍԻՄՈՆՅԱՆ
