Մինսկում Ուկրաինայի դեսպանատան աշխատակից Իգոր Սկվորցովը Բելառուսում հայտարարվել է «պերսոնա նոն գրատա» և կապ ունի ավելի վաղ ձերբակալված և լրտեսության մեջ կասկածվող «Ուկրաինսկոյե ռադիո»-ի թղթակից Պավել Շարոյկոյի հետ, գրում է meduza.io-ն:
Բելառուսի ԿԳԲ-ից հայտարարել են, որ Սկվորցովը Մինսկում Ուկրաինայի դեսպանատան խորհրդականն է: Ըստ դիվանագիտական ներկայացուցչության պաշտոնական կայքի՝ Սկվորցովը դեսպանատան առաջին քարտուղարն է:
Բելառուսի ԿԳԲ-ի տվյալներով՝ Սկվորցովը և Շարոյկոն Ուկրաինայի պաշտպանության նախարարության գլխավոր հետախուզական վարչության աշխատակիցներ են: Բելառուսի հատուկ ծառայությունները պնդում են, որ Շարոյկոն ստեղծել է գործակալների ցանց՝ «ռազմաքաղաքական ոլորտում հետախուզական բնույթի տեղեկություններ» հավաքելու համար, իսկ Սկվորցովը համակարգել է այդ աշխատանքները:
Բելառուսի ԿԳԲ պաշտոնական ներկայացուցիչ Դմիտրի Պոբյարժինը լրագրողներին հայտնել է, որ հարցաքննության ժամանակ Շարոյկոն խոստովանել է, որ գործակալ է: Խուզարկության ժամանակ նրա մոտ հայտնաբերվել է ուկրաինական կողմին ուղարկված տեղեկությունների պատճենը:
Լրտեսության գործով ձերբակալվել է նաև Բելառուսի մի քաղաքացի, որը դրամական վարձատրության դիմաց Ուկրաինային տեղեկություն է փոխանցել երկրի պաշտպանական հնարավորությունների մասին: Նրա դեմ հարուցվել է քրեական գործ՝ «պետական դավաճանություն» հոդվածով:
Հիշեցնենք, Պավել Շարոյկոն ձերբակալվել էր հոկտեմբերի վերջին, սակայն Բելառուսը չէր հրապարակում այդ տեղեկությունը (ԿԳԲ-ի պնդմամբ՝ դա համաձայնեցվել է Ուկրաինայի հետ): Այդ մասին հայտնի է դարձել միայն նոյեմբերի 17-ին, երբ իր թղթակցի ձերբակալության մասին տեղեկացրեց «Ուկրաինսկոյե ռադիո»-ն:
Պատրաստեց՝ Վիկտորյա ԱՆԴՐԵԱՍՅԱՆԸ
