«Պաշտպանյալիս զրպարտել են՝ տարածելով, թե ալկոհոլիկ է, կազինոներ է գնում: Սովորական մարդիկ ոնց են, որ քիչ քանակությամբ ալկոհոլ են օգտագործում քեֆերին, իմ պաշտպանյալն էլ է այդպես, եթե նա հարբեցող է, ուրեմն ես էլ եմ հարբեցող»,- Aravot.am-ի հետ զրույցում ասաց hոկտեմբերի 30-ին Արմավիրի «Մանուշակ» մանկապարտեզում տեղի ունեցած միջադեպի գլխավոր «հերոսի»՝ պատանդառաուի շահերի պաշտպան Արսեն Սարգսյանը:
Նա պնդում է՝ դեպքի օրն էլ է իր պաշտպանյալը՝ Արգամ Հովիկյանը, սթափ եղել: Փաստաբանը պատմեց, որ Հոկտեմբերյանից ծանոթներ ունի, որոնցից հետաքրքրվել է իր պաշտպանյալի վարքի մասին. «Ասում են՝ չենք լսել՝ ինչ կազինո, ինչ դրամամիջոցներ, ինչ ալկոհոլ, իրենից հեռու բաներ են»:
Արգամ Հովիկյանը մեղադրվում է սպանության փորձ կատարելու համար, ինչի համար որպես պատիժ նախատեսվում է քսան տարվա կամ ցմահ ազատազրկում: Ըստ փաստաբանի՝ «Առաջնայինն այն է, որ ապացուցենք, որ այս մարդը սպանելու նպատակ չի ունեցել, խանգարող ոչինչ չկար, եթե դանակը ձեռքին էր ու ուզում էր սպանել, ապա կսպաներ»:
Արգամ Հովիկյանը առաջադրված մեղադրանքը չի ընդունում, բայց խոստովանել է, որ գիտակցել է իր արարքը դեպքի պահին. «Պատճառաբանում է իր արարքը, ասում է՝ այնպիսի իրավիճակ էր, երբ պատուհանից տեսա՝ ոստիկանները շրջապատում են շենքը, հեսա ինձ կբռնեն, ստիպված այդ քայլին գնացի, որ հասնեմ իմ առաջնային նպատակին: Եթե չեմ կարող կնոջս տուն տանեմ, գոնե ինքնասպան կլինեմ նրանց աչքի առաջ: Այդ նպատակով բռնեցի երեխային, որ պահանջեմ կնոջս բերեն, ու հենց կնոջը տարել են իր մոտ, բոլորի աչքի առաջ դանակով իրեն վնասել է: Ինքնասպանության փորձն արել է, ուղղակի սրտից մի քիչ ներքեւ է հարվածը ստացել ու չի մահացել»:
Փաստաբանն ասաց, որ դեռ տուժողի ու ամբաստանյալի միջեւ առերեսում չի եղել, այն նախատեսված է առաջիկայում:
Արփինե ՍԻՄՈՆՅԱՆ
