Վարպետաց տուն. Ձոն Ջիվանու անվան աշուղական դպրոցին (բանաստեղծություն)

Վարպետաց տու՛ն, աշուղների սու՛րբ ոստան,

Երգդ՝ կանթեղ, գործդ՝ անմահ, պատմական,

Քո սաներով պիտի ծաղկի Հայաստան,

Մեծ Ջիվանու անվան դպրո՛ց պատվական:

Երևանի սրտում՝ դու վարդ-բուրաստան,

Քեզնով շնչեց վայրի հանդ ու անդաստան,

Քո սուրբ գրկում պիտի ապրի հայ դաստան,

Մեծ Ջիվանու անվան դպրո՛ց պատվական:

Աշուղատեր վարպե՛տ Թովմաս, ո՜վ երգիչ,

Ավետյաց լուր, վարդագիր է քո գրիչ,

Քեզ զորացրեց բարի Աստված, Արարիչ,

Որ դու հիմնես մեր սուրբ դպրոց պատվական:

Ձեռնադրվել մեր օրերում շատ բարդ է,

Ամեն աշուղ վարդարանիդ մի վարդ է,

Ամեն մի տաղ զարդարանիդ մի զարդ է,

Մեծ Ջիվանու անվան դպրոց պատվական:

Սայաթ-Նովա՛, Շերա՛մ, Շահե՛ն, ունենք տուն,

Արդեն չունենք մենք հայ աշուղ՝ խեղճ, անտուն,

Աստղանուշիս համար ասես հերանց տուն,

Մեծ Ջիվանու անվան դպրո՛ց պատվական:

ԱՇՈՒՂ ԱՍՏՂԱՆՈՒՇ