«Ելք» խմբակցության ղեկավար Նիկոլ Փաշինյանն առաջարկում է Հաղթանակի զբոսայգու եւ դրան հարակից տարածքների դղյակները տուրիզմի զարգացման կոնցեպտի մեջ մտցնել, քանի որ առաջին երկիրն ենք, որ կոռուպցիայի թանգարան ունի բաց երկնքի տակ: Փաշինյանն առաջարկում է նաեւ Հովիկ Աբրահամյանին նշանակել այնտեղ՝ որպես գիդ, քանի որ ամեն քարից տեղյակ է: Այս առնչությամբ մենք ՀՀԿ խմբակցության ղեկավար Վահրամ Բաղդասարյանին հարցրեցինք՝ այս առաջարկն ինչքանո՞վ է ընդունելի ձեզ համար: Նա պատասխանեց. «Բոլորիս ցանկությունն է, որ Հայաստանում շատ դղյակներ, շատ կառույցներ լինեն եւ ուսումնասիրվի, որ այդ միջոցները համապատասխանում են այդ դղյակներին, թե ոչ: Համենայնդեպս, մենք պետք է ոչ թե վատ ընդունենք լավ կառույցների համար, այլ պետք է ավելի շատ ուսումնասիրենք այդ հիմքերը: Եթե դրանք համապատասխան հայտարարագրեր ունեն եւ օրինականությանը համապատասխանում են, ինձ թվում է լավ է, որ Հայաստանում կառուցվեն նման դղյակներ»:
Դիտարկմանը՝ այս աղքատ երկրո՞ւմ՝ Վահրամ Բաղդասարյանը պատասխանեց, որ հարուստներ էլ կան, աղքատներ էլ կան, հավասար դաշտ չի կարող լինել բոլորի համար. «Պետք է նախ ուսումնասիրվեն հարուստների հարստացման ճանապարհները, եթե օրինական են դրանք, ես դա նորմալ եմ ընդունում»:
Լրագրողները նկատեցին, որ մենակ իշխանություններն են այդպես հարստանում եւ դղակների տեր դառնում՝ Վահրամ Բաղդասարյանը չհամաձայնեց. «Եթե 90-ականներից հետեւեք, ինձ թվում է՝ անընդհատ փոփոխական է եղել իշխանություն-ընդդիմությունը, բոլորն էլ եղել են իշխանություն: Այդ գունապնակը բավականին հարուստ է եղել, հիմնական կառուցողներից ճնշող մեծամասնությունը կապ չունի իշխանության եւ քաղաքականության հետ: Այնտեղ կան անկախ մարդիկ եւ նրանց քանակը շատ մեծ է: Ամեն ինչը պետք է նայել համեմատության դաշտում, կարող են լինել նաեւ իշխանավորներ: Ես սիրահար եմ շինարարության, ինձ համար շատ լավ է, որ գեղեցիկ լինի, բայց դրանց ճանապարհները պետք է ստուգվեն: Եթե կան անօրինական ճանապարհով կառուցված դղյակներ՝ դրան պետք է անդրադառնալ»: Վահրամ Բաղդասարյանն ասաց, որ վերջերս է եկել Տաջիկստանում, որտեղ ՀՆԱ-ն վատ վիճակի մեջ է, բայց ի՜նչ շինարարություն էր ընթանում: Հարցրեցինք՝ Տաջիկստանի այդ շինարարությունը, դղյակներն է՞լ են իշխանության ներկայացուցիչներն անում՝ Բաղդասարյանը պատասխանեց. «Ես հազարավոր գործարարներ գիտեմ, որոնք բացարձակապես կապ չունեն իշխանության հետ, քաղաքականության հետ, նրանք բավականին մեծ կառույցների տեր են»:
Մենք հարցրեցինք՝ Դուք հայտարարագրերն եք վկայակոչում, բայց չե՞ք գտնում, որ այդտեղ խնդիր կա. Բազմաթիվ պաշտոնյաներ կան, որոնք հենց դարձել են պետական պաշտոնյա, լիքը բիզնեսներ են ունենում, տներ են գրանցում, հենց հարցնում ենք՝ ո՞նց եղավ այսքան կարճ ժամանակում դարձաք միլիոնատեր, պարզվում է՝ կա՛մ պապենական ժառանգություն են ստացել, կա՛մ նվիրատվություն է, կամ էլ ասում են՝ այ այն երկու տարին, որ չեմ աշխատել, բիզնեսով եմ զբաղվել: Օրինակ, այդպես է բացատրում իր ունեցվածքը Խոսրով Հարությունյանը, Վառնայում տուն է գնել, ասում է՝ այն տարիներին եմ գնել, երբ պետական պաշտոն չեմ զբաղեցրել, ինչպե՞ս կբացատրեք սա: Վահրամ Բաղդասարյանը պատասխանեց. «Ի տարբերություն ձեզ, ես ուրիշների ունեցվածքը չեմ հաշվում, բայց դուք նշում եք մարդկանց անուններ, որ ամբողջ կյանքում նրանք եղել են բիզնեսի մարդիկ եւ բավականին պահանջված մենեջերներ են եղել: Եթե մեկ-երկու տարի արդեն եղել են քաղաքականության մեջ, դուք վերագրում եք, որ արդեն նրանք եկան իշխանության եւ կառուցեցին դղյակներ»:
Նա ասաց, որ վարչապետը, օրինակ, կամ ՊԵԿ նախագահը պետական կառույցներում չեն եղել, անընդհատ բիզնեսով են զբաղվել. «Ես 16 տարեկանից աշխատել եմ, իհարկե, ես չեմ համեմատվում ձեր ասած տրամաչափին, բայց, համենայնդեպս, 16 տարեկանից ես կառուցում եմ, մենք 3 եղբայրներով կառուցում ենք եւ կարող է մի տեղ տեսնեք, ասեք՝ նայեք ինչ շինություն ունի, որտեղի՞ց է»:
Մենք հարցրեցինք՝ դուք ձեր աղջկան ոսկեձույլ լոգարան կամ լոգարանի պարագաներ չեք նվիրում չէ՞ համենայնդեպս, նրանք, ովքեր նվիրում են, մեր աչքը տեսնում է՝ Բաղդասարյանը պատասխանեց. «Եթե իմ հնարավորությունները ներեին էլ, ես դա պարզապես անընդունելի եմ համարում»:
Հռիփսիմե ՋԵԲԵՋՅԱՆ
