Aravot.am-ը Հայաստանի Հանրապետական եւ «Հայկական վերածնունդ» խմբակցությունների Վանաձորի տարածքային կառույցների միջեւ կնքված համագործակցության հուշագրի վերաբերյալ փորձեց մեկնաբանություն ստանալ «Բարգավաճ Հայաստան» խմբակցության Վանաձորի համայնքի ավագանու անդամ Հրանտ Մարգարյանից, սակայն վերջինս նշեց, որ ինքը տեղյակ չէ. «Ես չեմ կարող մի բանը մեկնաբանել, որից ես տեղյակ չեմ: Դա իրենց իրավունքն է, ես ի՞նչ ասեմ»:
Փոխարենը ավագանու անդամը մեզ հետ զրույցում վստահեցրեց, որ իրենք շարունակելու են բոյկոտը՝ չներկայանալով նիստերին. «Մենք չենք պատրաստվում ներկայանալ առաջիկա արտահերթ նիստին: Մեր դիրքորոշման մեջ ոչինչ չի փոխվել, շարունակելու ենք բոյկոտը»:
Հիշեցնենք, որ նոյեմբերի 23-ին տեղի է ունենալու համայնքի ավագանու հերթական նիստ: Սակայն քիչ առաջ Վանաձորի քաղաքապետարանի պաշտոնական կայքում տեղադրվեց հայտարարություն, որ նոյեմբերի 21-ին նշանակված է ավագանու արտահերթ նիստ, որի օրակարգում ընդգրկված է մեկ հարց՝ ՀՎԿ կառույցի ղեկավար Արկադի Փելեշյանին նշանակել համայնքի ղեկավարի առաջին տեղակալի պաշտոնում:
Տաթեւիկ ՂԱԶԱՐՅԱՆ
