Կարծում է Արամ Խաչատրյանի տուն-թանգարանի տնօրեն Արմինե Գրիգորյանը
Արամ Խաչատրյանի տուն-թանգարանի տնօրեն Արմինե Գրիգորյանը մեզ տրամադրեց թանգարանի միջին տարեկան այցելությունների ընդհանուր թիվը, որը կազմում է 20000-25000:
«Տարեցտարի այցելուների թիվն ավելանում է, բայց բնական է, որ այս ցուցանիշը մեզ այդքան էլ չի գոհացնում, աշխատում ենք այն ավելացնելու ուղղությամբ»,- նշեց տիկին Գրիգորյանը: Աշխարհահռչակ կոմպոզիտորը սիրված եւ գնահատված է օտարերկրացիների կողմից եւս: Արմինե Գրիգորյանը փաստեց, որ այցելուների զգալի մասը կազմում են հենց օտարերկրացիները:
Հարցին` Արամ Խաչատրյանի անձնական իրերը, որոնք վերջերս են բերվել արտերկրից, այցելուների շրջանում աշխուժություն առաջացրե՞լ են, Արմինե Գրիգորյանը պատասխանեց. «Ճիշտն ասած, ավելի մեծ արձագանքի էինք սպասում: Բայց դեռ հույսս չեմ կորցրել: Կարծում եմ՝ շուտով կունենանք այցելուներ, որոնք կհետաքրքրվեն այդ նոր ցուցանմուշներով: Դրանք ունեն շատ հետաքրքիր պատմություն, այսինքն՝ միայն կահույքի մասին չէ խոսքը»:
Թանգարանի տնօրենը զգուշությամբ է մոտենում թանգարանը տեխնիկապես վերազինելու հարցին: Իր կարծիքով՝ հատկապես տուն-թանգարանը պետք է պահի այն յուրօրինակ միջավայրը, մթնոլորտը, որը կենդանություն է հաղորդում. «Իհարկե, հարկավոր է հետաքրքիր տեխնիկական նորամուծություններ մտցնել թանգարան, բայց նաեւ չպետք է չափն անցնել»:
Արամ Խաչատրյանի տուն-թանգարանում այս տարի նորամուծություն է աուդիոգիդը, որը տասը լեզվով ներկայացնում է 25 ցուցանմուշի պատմություն: Սա մշակույթի նախարարության ծրագիրն է:
Արամ Խաչատրյանի տուն-թանգարանում հաճախ են կազմակերպվում համերգներ, եւ մեր հարցին, թե հաջորդ համերգը երբ տեղի կունենա, Արմինե Գրիգորյանը պատասխանեց. «Դեկտեմբերին կունենանք համերգներ, որոնք հաստատ կգրավեն մեր այցելուների ուշադրությունը: Դրանցից մեկն արդեն ավանդույթ դարձած նախագիծն է, որը կոչվում է «Գերմանացի կոմպոզիտորների թանգարանները՝ Խաչատրյանի տանը»:
Հաջորդ տարի կկազմակերպվի միջազգային գիտաժողով, որը թվով երկրորդը կլինի: Առաջին փորձը եղել է Արամ Խաչատրյանի 110-ամյակին:
«Հաճախ հրավերներ ենք ստանում տարբեր երկրներից՝ մասնակցելու թանգարանային սեմինարների, կոնֆերանսների. հնարավորինս փորձում ենք մասնակցել: Ֆինանսական աջակցության դեպքում, կարծում եմ, ավելի ակտիվ կլինենք»,-զրույցի ավարտին ասաց տնօրենը:
ՄԱՆԵ ՄՈՒՐԱԴՅԱՆ
«Առավոտ»
17.11.2017
