Ճարճատուկը, կամ ինչպես հայտնի է՝ ցիկորին, բավական օգտակար դեղաբույս է: Այն օժտված է լեղամուղ, միզամուղ, հակաբորբոքային, ախորժաբեր հատկություններով: Հաջողությամբ կիրառվում է մարսողության խանգարումների (փքվածության, գլխացավեր, դանդաղ մարսողության) շաքարային դիաբետի, նյարդային գերգռվածության ժամանակ:
Դեղատոմսեր եւ պատրաստուկներ
Լեղուղիների շարժողունակության խանգարումներ
1 թեյի գդալ բույսին ավելացնել 1 բաժակ եռման ջուր, թրմել մինչեւ սառելը՝ թողնել սենյակային ջեմաստիճանում՝ կափարիչով ծածկված վիճակում, քամել: Ընդունել 0.5 բաժակ՝ օրը 2 անգամ՝ ուտելուց 30 րոպե առաջ:
Լյարդի, լեղապարկի գործունեության խանգարումներ
1գդալ մանրացված արմատներին ավելացնել 1 բաժակ եռման ջուր, եռացնել մարմանդ կրակի վրա 10 րոպե, սառեցնել, քամել: Ընդունել 0.5 բաժակ՝ օրը 2-3 անգամ:
Լյարդի ֆունկցիոնալ խանգարումներ
2 ճաշի գդալ մանրացված արմատներին ավելացնել 0.5 լիտր եռման ջուր, եռացնել մարմանդ կրակի վրա 15 րոպե, քամել: Եփուկին ավելացնել 2 ճաշի գդալ մեղր եւ 1 թեյի գդալ խնձորի քացախ: Ընդունել տաք վիճակում 0.5 բաժակից՝ օրը 2 անգամ՝ ուտելուց առաջ:
Ռեւմատիզմ
40 գրամ մանրացված արմատներին ավելացնել 1 բաժակ եռման ջուր, տաքացնել եռացող ջրաբաղնիքի վրա 30 րոպե՝ անընդհատ խառնելով, քամել: Ընդունել 1 ճաշի գդալ՝ օրը 3 անգամ:
Ճարճատուկի թուրմը օգտակար է նաեւ մազաթափության ժամանակ. 3 ճաշի գդալ մանրացված բույսին ավելացնել 1 բաժակ եռման ջուր, տաքացնել մարմանդ կրակի վրա 20 րոպե, թրմել 8 ժամ տաք տեղում, քամել: Քսել մազարմատներին՝ գլուխը լվանալուց հետո:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
17.11.2017
