«Դատարանում մենք հետազոտում ենք Գեւորգ Սաֆարյանի ելույթները, բայց Գեւորգ Սաֆարյանը կալանավորված է, գտնվում է «Նուբարաշեն» ՔԿՀ-ում ու նրա նկատմամբ բռնություններ են տեղի ունենում: Այսինքն, մենք ցույց ենք տալիս Գեւորգ Սաֆարյանի՝ փառավոր հայ երիտասարդի կերպարը, բայց չենք բարձրաձայնում, որ Գեւորգ Սաֆարյանի նկատմամբ իր խցում երեկ բռնություններ են կիրառվել տարբեր պատճառներով»,- այսօր Շենգավիթ վարչական շրջանի դատարանում հայտարարեց Ժիրայր Սեֆիլյանի փաստաբան Տիգրան Հայրապետյանը:
Հիշեցնենք, որ այսօր դատարանը, դատական սանկցիա կիրառելով, հեռացրել էր դահլիճից Սաֆարյանին չորս ժամով, երբ չորս ժամ անց Սաֆարյանը վերադարձավ դահլիճ, չկար նրա պաշտպան Տիգրան Եգորյանը:
Սաֆարյանը հետաքրքրվեց դատարանից՝ ինչու չեն կանչել իր պաշտպանին՝ պնդելով, որ իր պաշտպանական իրավունքներն են ոտնահարվում: Տեղից ու նստած խոսելու համար դատարանը Գեւորգ Սաֆարյանի նկատմամբ նախազգուշական սանկցիա կիրառեց, իսկ երբ Սաֆարյանը շարունակեց խոսել, դատարանը կրկին դատական սանկցիա կիրառեց՝ նրան հեռացնելով դահլիճից:
«Կան անձինք, որոնք ՔԿՀ վարչակազմում չեն կարողանում ապահովել Գեւորգ Սաֆարյանի անվտանգությունը, ուր է նրա փաստաբանը, ես նրա փոխարեն կմիջնորդեի Գեւորգ Սաֆարյանի խափանման միջոց կալանքը փոխել, որովհետեւ քրեակատարողական հիմնարկում Գեւորգն անվտանգ չէ»,- հավելեց Տիգրան Հայրապետյանը:
Դահլիճում նստածները սկսեցին ծափահարել ու այո բղավել ու ծափահարություններով ճանապարհեցին Գեւորգ Սաֆարյանին:
Արփինե ՍԻՄՈՆՅԱՆ
