«Իրատեսն» արդեն գրել է, որ ՀՀԿ-ում բավական մեծ դժգոհություն կա կուսակցության արտաշատյան թևից, քանի որ Արտաշատի քաղաքապետի ընտրությանը մասնակցության խայտառակ ցուցանիշ է գրանցվել: Այս հարցի առնչությամբ զրուցեցինք ԱԺ ՀՀԿ խմբակցության անդամ, Արարատի ՀՀԿ կառույցի ղեկավար ԱԼԻԿ ՍԱՐԳՍՅԱՆԻ հետ:
-ՀՀԿ վերնախավը դժգոհությու՞ն է հայտնել Ձեր աշխատանքից Արտաշատում ընտրությունների մասնակցության չափազանց ցածր տոկոսի պատճառով:
-Ի՞մ աշխատանքից:
-Դուք էիք նաև ընտրության կազմակերպման պատասխանատուներից մեկը:
-Ես ՀՀԿ կառույցի ղեկավարն եմ, իսկ ի՞նչ էիք ուզում, առավոտից իրիկուն քաշքշելո՞վ մարդկանց բերեինք ընտրության: Ինչը բնական է, դրա հետ հաշվի պետք է նստել: Ժողովուրդն այդքան ցանկացավ, այդքան էլ մասնակցեց: Ես ոչ այդպիսի հանձնարարական եմ ունեցել, ոչ նման պահանջ է եղել ինձնից: Թողել ենք մարդիկ գան, իրենց ազատ կամքը արտահայտեն, ընտրության մասնակցեն: Հիմա թող լինի 25 տոկոս մասնակցություն, պարտադիր պետք է 75 տոկո՞ս լինի: Քիչ մասնակցության պատճառը հիմնականում այն էր, որ մրցակցություն չկար: Եթե լիներ մրցակցություն, այլ թեկնածու, թիվը երեք կամ չորս անգամ կմեծանար: Մարդիկ հանգիստ էին, երեկոյան ժամը վեցին-յոթին ակտիվություն նկատվեց, մարդիկ ասում էին` դե կգնանք, ի՞նչ կա վռազելու:
-Տարօրինակ չէ՞, որ այդքան քիչ մասնակցություն եղավ մի տարածքում, որտեղ ընտրությունների ժամանակ միշտ մեծ մասնակցություն է գրանցվել:
-Ինձ տարօրինակ չի թվում: Ընտրությունների հաճախականությունը, կարճ ասած, մարդկանց վրա լավ ազդեցություն չի թողնում, քաղաքացիական ակտիվությունը բավական նվազել է: Մտածում են` հարյուր հոգի չլինի, թող լինի հիսուն հոգի, մեկ է, ընտրվելու են:
Ճեպազրույցը` Ռուզան ԽԱՉԱՏՐՅԱՆԻ
Հոդվածն ամբողջությամբ կարող եք կարդալ «Իրատես» թերթի այսօրվա համարում
