«Սասնա ծռերի» գործով այսօրվա դատական նիստում դատավոր Արտուշ Գաբրիելյանը մերժեց իր դեմ պաշտպաններից Մուշեղ Շուշանյանի ներկայացրած ինքնաբացարկի միջնորդությունը: Այնուհետեւ արդեն երրորդ ինքնաբացարկի միջնորդությունը ներկայացվեց դատավորին, այս անգամ՝ ամբաստանյալներից Մանվել Աթոյանի (լուսանկարում) շահերի պաշտպան, փաստաբան Արա Ղարագյոզյանի կողմից:
Նա եւս պնդեց, որ դատավորը կողմնակալ է, ինչը փաստվում է, օրինակ, այն հանգամանքով, որ նա որոշել է Մանվել Աթոյանի խափանման միջոց կալանքը թողնել անփոփոխ, այն էլ՝ անորոշ ժամկետով: «Հիմնավոր է կասկածն առ այն, որ դուք Մանվել Աթոյանի հանդեպ կանխակալ վերաբերմունք ունեք: Նա կալանավորվել է իր քաղաքական հայացքների համար եւ մինչ օրս ենթարկվում է քաղաքական հալածանքի»,-դիմելով դատավորին՝ ասաց փաստաբանը:
Մեղադրող-դատախազներից Հակոբ Ենոքյանն Արա Ղարագյոզյանի միջնորդության դեմ առարկեց՝ նկատելով, որ կա կալանքի՝ ուժի մեջ մտած որոշում, որով, սակայն, չգիտես ինչու պաշտպանը դատավորին մեղադրում է կողմնակալության մեջ:
Վերադառնալով խորհրդակցական սենյակից՝ դատավոր Արտուշ Գաբրիելյանը որոշեց իր դեմ այս ինքնաբացարկի միջնորդությունը եւս մերժել: Դա նշանակում է, որ գործը շարունակելու է քննել Արտուշ Գաբրիելյանը:
Այնուհետեւ պաշտպաններից Գրիշա Բալասանյանն էլ ներկայացրեց ամբաստանյալ Տիգրան Սարգսյանի խափանման միջոց կալանքը փոխելու միջնորդություն, որը եւս մերժվեց: Դա էլ ենթադրում է, որ Սարգսյանը շարունակելու է մնալ կալանավորված:
Լուիզա ՍՈՒՔԻԱՍՅԱՆ
