Վանաձորի քաղաքապետ Մամիկոն Ասլանյանն ասում է, որ ուսումնասիրել են Սահմանադրական դատարանի նոյեմբերի 10-ին կայացրած որոշումը: Նրա խոսքով այս ամիսների ընթացքում իրենք բոլոր նիստերն ու որոշումները կայացրել են գործող օրենքի շրջանակներում:
-Մեր մասով որեւէ հակաիրավական ճանաչված խնդիր չկա: ՍԴ-ն իր պարզաբանումների մեջ պարզ նշել է, որ մենք այդ պահին գործող օրենքի շրջանակներում ենք իրավական ակտեր կայացրել եւ իրավական ու բովանդակային տեսակետից որեւէ խնդիր մեր նիստերի եւ որոշումների մեջ չկա: Այստեղ խնդիրը ծագման հիմքի վերաբերյալ է, այսինք՝ 63-րդ հոդվածի 3-րդ կետի, ինչի սահմանադրականությունը վիճարկվել է եւ ԱԺ-ի համապատասխան փոփոխություններից ու լրացումներից հետո, մենք էլ մեր ավագանու նիստերի որոշումները կբերենք այդ դաշտ:
Հիշեցնենք, որ Aravot.am-ի հետ զրույցում «Լուսավոր Հայաստան» խմբակցության ղեկավար Քրիստ Մարուքյանը նշել էր, որ կան բավարար հիմքեր Վանաձորում նոր ընտրություններ անցկացնելու համար:
Սակայն քաղաքապետը կարծում է, որ նոր ընտրություններ Վանաձորում չեն անցկացվի, քանի որ ՍԴ-ն իր որոշման մեջ այդ մասին ոչինչ չի ասում. «Նիստերի մասով որեւէ խնդիր չկա, որովհետեւ հենց ՍԴ-ն է հղում անում, որ այս նիստերի ընթացքում ընդունված որոշումները, հետեւաբար, եթե նիստ կայացած չլիներ ՍԴ-ն հղում չէր անի, եւ «Լուսավոր Հայաստանի»-ի ասած ավագանու լիազորությունների կրճատման հետ կապված սահմանադրական է ճանաչվել այդ նորմը եւ իրենց մերժել են, այսինքն` ուժի մեջ են թողել: Ընտրությունների մասին այնտեղ որեւէ հարց չկա, որովհետեւ այդ պահին գործող օրենքը, եթե չկիրառեինք, այ այդ ժամանակ մենք խնդիր կունենայինք: Բայց եթե այդ պահին մենք գործող օրենքը կիրառել ենք, ինչի՞ մասին է խոսքը: Վանաձոր քաղաքում իրավական ակտերն ավագանին ընդունում է ոչ թե Սահմանադրության վրա հղում անելով կամ դրա հիման վրա, այլ ՏԻՄ մասին օրենքի հիման վրա, ինչը որ մենք կիրառել ենք: Հետևաբար` մեզ կապել անմիջապես Սահմանադրության կատարման հետ, ճիշտ չէ»:
Իսկ մինչ այդ, Մամիկոն Ասլանյանը վստահեցրեց, որ նոյեմբերի 23-ին նշանակված նիստը կկայանա. «Նիստը մենք հայտարարել ենք, այն գումարվելու է, իսկ մնացած մանրամասները՝ նիստի օրը»:
Տաթեւիկ ՂԱԶԱՐՅԱՆ
