ԲՈՀ-ի նախագահ, բանասիրական գիտությունների դոկտոր Լիլիթ Արզումանյանը հավաստիացնում է, որ իրենց մոտ չի գործում ծանոթ-բարեկամի սկզբունքը: «Կարողանում ենք արդարություն պահել, շատ օբյեկտիվ ենք, եւ դա արդյունք է տվել: 4 տարի առաջ մերժումների թիվը 130 էր, հետո 70, ապա 40, իսկ այս տարի՝ ընդամենը 30»,- նշեց տիկին Արզումանյանը:
Նա նաեւ հավելեց, որ եթե անցյալ տարի 460 հոգի էր պաշտպանել` ներառյալ Իրանի քաղաքացիներ, ապա այս տարի` 370: Նրանց մեջ 38-40-ը գիտությունների դոկտոր է:
Ամենամեծ թվով տնտեսագետ գիտնականներն են, պատճառն էլ, ըստ ԲՈՀ-ի նախագահի, այն է, որ ասպիրանտուրայի տեղերի առյուծի բաժինը տնտեսագիտությանն է, հետո գալիս են տեխնիկական գիտությունները, ֆիզիկամաթեմատիկականը, բանասիրությունը:
Լիլիթ Արզումանյանը նաեւ նշեց, որ ԲՈՀ-ում չհաստատված եւ մասնագիտական խորհուրդներ վերադարձվում են այն աշխատանքները, որոնցում հայտնաբերվել են արտագրություններ, թերություններ: Նոյեմբերի 5-ի դրությամբ, այդ աշխատանքների թիվը 28 է, դրանցից 8-ը` դոկտորական:
Գոհար ՀԱԿՈԲՅԱՆ
