«Ես կոչ կանեմ ուսանողներին մասնակցել հանձնաժողովի աշխատանքներին եւ կարողանան գտնել այն հարցերի լուծումները, որոնց պատճառով իրենք հացադուլ են անում»,- խորհրդարանում, լրագրողների հետ զրույցում ասաց ՀՀԿ-ական պատգամավոր, գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի փոխնախագահ Կարեն Ավագյանը`դիմելով տարկետման փոփոխությունների դեմ պայքարող երիտասարդներին:
Լրագրողներից մեկը հետաքրքրվեց`ինչո՞ւ ինքն իբրեւ պատգամավոր չի հանդիպում ուսանողների հետ, չի փորձում լսել նրանց առաջարկները, Կարեն Ավագյանն ասաց. «Կլինի՞ ես որոշեմ, ոչ թե դուք ինձ ուղղորդեք։ Ես պատգամավոր եմ եւ իմ գործունեությանը հստակ եմ տիրապետում։ Եթե դրա կարիքը լինի, որ իմ ասելով այդ մարդիկ կդադարեցնեն այդ պրոցեսները, կխոսեմ: Բայց մեր շատ գործընկերներ արդեն փորձել են, բայց ապարդյուն»:
Հիշեցնենք, խորհրդարանն այսօր երկրորդ ընթերցմամբ եւ ամբողջությամբ ընդունել է «Զինվորական ծառայության եւ զինծառայողի կարգավիճակի մասին» վիճահարույց օրենքը, սակայն ուսանողները դեռ շարունակում են բողոքի ակցիաները ` անակնկալներ խոստանալով:
Նելլի ԳՐԻԳՈՐՅԱՆ
