ԱԺ փոխնախագահ Էդուարդ Շարմազանովը քիչ առաջ լրագրողների հետ զրույցում հայտարարեց, որ ինքը պատրաստվում է ժամը 14.00-ին ընդունել տարկետման իրավունքի փոփոխությունների դեմ խորհրդարանի շենքի առջեւ բողոքի ակցիաները շարունակող 4-5 հոգանոց պատվիրակության: Նկատենք, որ ակցիայի մասնակից ուսանողները պահանջում են, որպեսզի իշխանական պատգամավորները իջնեն եւ հանդիպեն իրենց հետ: Էդուարդ Շարմազանովն ասաց, որ ընդունելով երիտասարդներին՝ ինքն ուզում է ցույց տալ, որ իշխանությունում անհաղորդ եւ անտարբեր չեն ընթացող իրադարձություններին եւ ուսանողների պահանջն անարձագանք չի մնում: Միաժամանակ նա հայտարարեց, որ իշխանությունում չեն պատրաստվում գնալ զիջումների եւ ուսանողների պահանջած փոփոխությունները կատարել օրենքում:
Հիշեցնենք, որ «Զինվորական ծառայության եւ զինվորականի կարգավիճակի մասին» վիճահարույց օրենքը խորհրդարանն այսօր ընդունեց երկրորդ ընթերցմամբ եւ ամբողջությամբ:
Նելլի ԳՐԻԳՈՐՅԱՆ
