«Պարզվում է՝ մեր պետությունը ամեն տարի ֆինանսավորում է նավամոդելային սպորտը՝ 2016-ին, 2017-ին, 2018-ին նույն գումարն է հատկացվում՝ միջոցառումների թիվը՝ մեկ, մասնակիցների թիվը՝ 5: Ես խնդրում եմ, եթե հնարավոր է, բացատրեք սա ի՞նչ է, գուցե ազգ-բանակ կոնցեպտի շրջանակներո՞ւմ է սա արվում: «Մենք ենք, մեր սարերի» ոճով ասեմ՝ պետությունը հովվին քիչ է վճարում, բժշկին քիչ է վճարում, որպեսզի նավամոդելային սպո՞րտը զարգանա»,- ԱԺ-ում 2018-ի բյուջեի նախագծի քննարկման ժամանակ «Ելք» խմբակցության պատգամավոր Արարատ Միրզոյանը հարցրեց ֆինանսների նախարար Վարդան Արամյանին:
Արամյանը պատասխանեց, որ դա սպորտի եւ երիտասարդության նախարարության մանդատի ներքո է, թե ինչ սպորտ ենք մենք զարգացնում:
«Ծառուկյան» խմբակցության պատգամավոր Սերգեյ Բագրատյանն էլ Արամյանին ասաց, որ բյուջեի ուղերձը զարմանք եւ տարակուսանք է հարուցում՝ իր անիրատեսականությամբ. «Նշում եք, որ բյուջեն հիմնված է երեք հենասյուների վրա, որոնցից մեկը հավասարակշռված եկամտային քաղաքականությունն է»: Նա հարցրեց՝ ինչո՞ւ եք խեղում գործարար միջավայրը եւ 2017-ի ստվերային տնտեսությունը ի՞նչ չափով է կրճատվել, ո՞ր ոլորտներից եւ արդյունքում բյուջեն ի՞նչ չափով է համալրվել:
Արամյանը պատասխանեց՝ ինչո՞ւ է ձեր մոտ նման պատկերացում, ես վստահ եմ, որ որեւէ խեղում չկա: Նա նշեց, որ ստուգումները կրճատել են 50 տոկոսով, դա անհարկի միջամտություն է՝ տնտեսվարողի կյանքին, փոխարենը՝ ապահովում են հարկային եկամուտներ, հավաքագրումների ավելացում: Այն, որ հարկեր-ՀՆԱ հարաբերակցությունն աճում է, դա նշանակում է, որ ստվերից գումարներ են բերվում. «Տոկոսներով ես կդժվարանամ ասել»:
Բագրատյանն արձագանքեց, որ միգուցե խոշոր հարկատուների ստուգումների քանակն եք կրճատել, բայց ավելացրել եք մանր բիզնեսի ստուգումների քանակը, բազմահազար տնտեսվարողներ բողոքում են, մարդկանց պայուսակները, գնումներն են ստուգում, դա անհարկի միջամտություն չէ՞, խեղում չէ՞ գործարար միջավայրի:
Հռիփսիմե ՋԵԲԵՋՅԱՆ
