Տարկետման իրավունքը սահմանափակող ՊՆ օրինագծի (որն այսօր ԱԺ-ն ընդունեց) դեմ բողոքող ուսանողներն այսօր որոշեցին ի վերջո բացել Դեմիրճյան փողոցը եւ շարժվել դեպի ԱԺ գլխավոր մուտքի մոտ:
Նրանք փակեցին նաեւ Բաղրամյան պողոտայի երթեւեկելի մասը: Պողոտան այժմ միակողմանի է երթեւեկելի, իսկ ոստիկանությունն ավելացրեց ծառայողների թիվը:
Ոստիկանների եւ ուսանողների միջեւ հրմշտոց տեղի ունեցավ: «Մի րոպե՜…Եթե բրդելու խնդիր լիներ, 2 րոպեում Ձեզ կարգի կհրավիրեինք»,-դասադուլավորներին ասաց Երեւանի փոխոստիկանապետ Վալերի Օսիպյանը:
Նա ուսանողներին կոչ արեց տեղափոխվել մայթեզր, այլապես բոլորին կարգի կհրավիրեն: «Մենք հասկանում ենք ձեր խնդիրը, բայց դուք չարաշահում եք….ձեր արարքը տանում է ոստիկանության հետ բախման եւ հրահրում եք….մենք տեւական ժամանակ հանդուրժել ենք, իսկ դուք հավաքների մասին օրենքը յոթ օր շարունակ խախտել եք՝ երթեր եք արել առանց թույլտվության»,-ասաց նա ուսանողներին:
Լրագրողների հետ զրույցում էլ Օսիպյանը նշեց, որ ուսանողներն արդեն լկտիանում են եւ սահմանափակում մյուս քաղաքացիների ազատ տեղաշարժը, խոչընդոտում երթեւեկությանը:
Ոստիկանությունը ցուցարարներին հինգ րոպե ժամանակ տվեց պողոտան ազատելու, այլապես օրենքով նախատեսված գործողությունների կդիմեն:
Լուիզա ՍՈՒՔԻԱՍՅԱՆ
