«Առաքելություն» կուսակցությունը մտահոգություն է հայտնում «Զինվորական ծառայության և զինծառայողի կարգավիճակի մասին» ՀՀ օրենքի նախագծի վերաբերյալ. օրենքի նախագծով տարկետման իրավունքի սահմանափակումը բարձրագույն կրթություն ստանալու ընթացքում էական վնաս կառաջացնի կրթության շարունակականությանը:
Միևնույն ժամանակ, կարևորելով և՛ բանակում, և՛ կրթության ոլորտում բարեփոխումների անհրաժեշտությունը, կուսակցությունն առաջարկում է՝
• Օրենքում պահպանել ուսումը շարունակելու համար տրամադրվող տարկետման իրավունքի ներկայիս հնարավորությունները,
• Բարձրագույն կրթության ընթացքում ներառել զինվորական պատրաստության դասընթացներ ընդհանուր 6-12 ամիս տևողությամբ՝ զինվորական հավաքների մասնակցությամբ, զորամասերում ժամանակավոր ծառայություն անցնելով,
• 2018թ. պետական բյուջեում և հետագայում կրթության և գիտության ոլորտներին տրամադրվող ծախսերն առնվազն կրկնապատկել
• Ծախսերի ավելացման արդյունքում առաջնահերթ բարձրացնել դասախոսական կազմի աշխատավարձերը, միևնույն ժամանակ իրապես զբաղվել կրթության ոլորտում առկա կոռուպցիայի դեմ պայքարով,
ՀՀ ԱԺ ընդդիմադիր խմբակցություններին կոչ է անում՝ չսահմանափակվել զուտ տարկետում տրամադրել-չտրամադրելու հարցի արծարծման պաթետիկ իշխանական ծուղակի մեջ, այլ վեր հանել ստեղծված վիճակի իրական պատճառները։
Կուսակցությունն համերաշխություն է հայտնում օրենքի նախագծի վիճահարույց դրույթների դեմ պայքարող ուսանողությանը։
«Առաքելություն» կուսակցության քաղաքական խորհուրդ
