Այսօր լրագրողները ՀՀԿ պատգամավոր Հերմինե Նաղդալյանին հարցրեցին, թե ո՞ւմ հետ է պետության հաշվին 2 մլն դրամի մեկ ամսում խոսել Չինաստան:
Նաղդալյանը պատասխանեց. «Հեռախոսս փչացած է եղել, տեխնիկական խնդիր է եղել, 3G-ն չի անջատվել, դրանից է եղել»:
Հարցին՝ ասում են, Չինաստան եք խոսել՝ ձեր որդու հետ, սո՞ւտ է դա՝ նա պատասխանեց. «Չէ, Չինաստան իմ որդու հետ ես Whatsapp-ով եմ խոսում, դա վճարովի չի»:
Լրագրողները հարցրեցին՝ Դո՞ւք եք փոխհատուցելու դրա համար ձեր գրպանից՝ նա պատասխանեց, որ իրեն չեն ասել նման բան:
Ուշագրավ է, որ Նաղդալյանն ասաց, որ դա մի ամսվա վճար չի, մի քանի օրվա ընթացքում է 2 մլն-ի հաշիվ կազմել:
Լրագրողները զարմացան՝ մի քանի օրում 2 մլն վճա՞ր, ի՞նչ սակագնից եք օգտվում՝ Հերմինե Նաղդալյանը չպատասխանեց, նա շտապում էր մտնել իր սենյակ:
Մենք խնդրեցինք պարզաբանել, որ մութ չմնա որեւէ հարց, 2 մլն-ը բավականին խոշոր գումար է՝ նա պատասխանեց. «Պարզաբանելու որեւէ բան այդտեղ չկա: Այդտեղ որեւէ սակագնի խնդիր չկա, հեռախոսի խնդիր է եղել, 3G-ն չի անջատվել, 2-3 օրվա ընթացքում գործուղման ընթացքում այդքան գումար է տարել: Այդտեղ որեւէ ոչ խոսելու, ոչ սակագնի խնդիր չի եղել»:
Երբ լրագրողներն ասացին, որ դա ձեր մեղքով է եղել, ձեր սխալն է եղել, չե՞ք պատրաստվում վերադարձնել պետբյուջե այդ գումարը՝ Նաղդալյանը պատասխանեց, որ եթե նման պահանջ լինի…ու շխկացրեց դուռը:
Հռիփսիմե ՋԵԲԵՋՅԱՆ
Հ. Գ. ՀՀ ԱԺ հանրային կապերի վարչության պետ Արսեն Բաբայանը Aysor.am-ի հետ զրույցում հերքել է տեղեկությունը, թե Հերմինե Նաղդալյանը 2 մլն դրամի պարտք է կուտակել բջջային հեռախոսային խոսակցությունների համար, որը վճարվել է պետբյուջեից։
«2 մլն դրամը՝ չհիմնավորված բամբասանք է: Նման գումար չի եղել: Դեռևս մայիսին Հ.Նաղդալյանի բջջային հեռախոսի համար եղել է խոշոր գումար, որը ԱԺ աշխատակազմի կողմից վիճարկվել է: «ՎիվաՍել-ՄՏՍ» ընկերության կատարած ուսումնասիրության արդյունքում պարզվել է, որ պարտքը առաջացել է տեխնիկական խնդրի պատճառով, մասնավորապես, ռոումինգ ցանցում միացված է եղել 3G կապը: Ընկերությունը հրաժարվել է իր ներկայացրած հաշվից դեռևս մայիսին: Ուստի՝ ԱԺ աշխատակազմը գումար չի վճարել, հետևաբար՝ չկար և անհրաժեշտություն փոխհատուցման պահանջ ներկայացնելու», – ասաց Ա.Բաբայանը:
