Դասադուլ անող ուսանողներն այսօր, ինչպես ավելի վաղ հայտնեցինք, փորձում են ԵՊՀ ֆակուլտետներում իրազեկել հինգ ուսանողների՝ հացադուլ սկսելու մասին եւ այդ կերպ ավելացնել դասադուլավորների թիվը: Արեւելագիտության ֆակուլտետի անվտանգության աշխատակիցն արգելեց ուսանողին բարձրախոսով մուտք գործել շենք, սակայն վերջինս փոքր ինչ հրելով՝ ներս մտավ: Լսարաններից մեկում ԵՊՀ դասախոսը զարմացավ, որ որոշ ուսանողներ հացադուլ են սկսել, նստած ուսանողներն էլ ոչինչ չձեռնարկեցին ու շարունակեցին դասապրոցեսը:
«Լավ ծանոթ չեմ, բայց չեմ գտնում, որ արժի այդքան բորբոքվել»,-լրագրողներին ասաց ԵՊՀ դասախոսը, ապա հասկացրեց, որ պետք չի դասապրոցեսը խանգարել:
Լսարաններից մեկում էլ, որտեղ դաս էր անցկացնում «Ելք» դաշինքի ավագանու անդամ Արայիկ Հարությունյանը, ի տարբերություն մյուսների, ուսանողները վեր կացան եւ միացան դասադուլին:
Լրագրողների հետ զրույցում Հարությունյանը հացադուլի մասին այսպիսի կարծիք հայտնեց. «Դա ծայրահեղ քայլ է, բայց ակնկալելի: Դա իրենց իրավունքն է, ողջունում եմ, որ իրավունքների համար պայքարում են: Կփորձեմ այցելել նրանց ու հասկացնել, որ պայքարի այլ ձեւեր կան»: Նկատառմանը, որ այսպես դասապրոցեսն է խանգարվում, Արայիկ Հարությունյանն այսպես արձագանքեց. «Ուսանողի իրավունքն է դասի չմասնակցել»:
Ավագանու անդամի խոսքով՝ այս խնդրում Կրթության եւ գիտության նախարարը քիչ դերակատարում ունի, հիմնականը Վիգեն Սարգսյանն է. «Նրա պահվածքը շատ բացասական եմ գնահատում»:
ԵՊՀ դասախոս, թուրքագետ Ռուբեն Մելքոնյանն էլ լրագրողների հետ զրույցում ասաց. «Կարծում եմ, որ առանց ֆակուլտետային բաժանումների էլ ուսանողները կարող են իրենց իրավունքները տարբեր կերպ բարձրաձայնել եւ պաշտպանել: Այն ուսանողները, որոնք ցանկանում են ներկա լինել դասապրոցեսին, չպետք է տուժեն, փոխադարձ հարգանք պետք է լինի, դասադուլավորները չպետք է խանգարեն դասի նստողներին, վերջիններս էլ՝ նրանց»:
Ռուբեն Մելքոնյանը նաեւ վստահեցրեց, որ դասադուլավոր-ուսանողների հանդեպ իրենց ֆակուլտետում սահմանափակումներ եւ բռնություններ չեն եղել:
Լուիզա ՍՈՒՔԻԱՍՅԱՆ
