Քաղաքացիական ակտիվիստ Հակոբ Դեխնավիի գործով վկա Հրանտ Վարդանյանն այսօր կրկին չներկայացավ Արաբկիր, Քանաքեռ եւ Զեյթուն վարչական շրջանների ընդհանուր իրավասության դատարան:
Վարդանյանը ընտրատարածքային ընտրական հանձնաժողովի անդամ էր այս գործով վերջին վկան:
Հիշեցնենք, որ Հակոբ Դեխնավիին մեղադրանք է առաջադրվել, որ նա, ՀՀ Սահմանադրության փոփոխությունների 06.12.2015թ. հանրաքվեի օրը Երևան քաղաքի թիվ 4/01 ընտրական տեղամասում գրանցվելով որպես զանգվածային լրատվության միջոցի ներկայացուցիչ և ներկա գտնվելով հանրաքվեի ընթացքին՝ ժամը 17:00-ի սահմաններում բռնություն գործադրելով՝ խոչընդոտել է հանրաքվեի հանձնաժողովի աշխատանքը:
Թեեւ դատարանը վկա Հրանտ Վարդանյանին բերման ենթարկելու որոշում էր կայացրել դեռ նախորդ դատական նիստին, բայց ոստիկանները նրան չէին գտել, որ բերման ենթարկեին:
Դատարանն ուժի մեջ թողեց վկային բերման ենթարկելու որոշումը ու դատական նիստը հետաձգեց մինչեւ դեկտեմբերի յոթը:
Արփինե ՍԻՄՈՆՅԱՆ
