Աջափնյակ եւ Դավթաշեն վարչական շրջանների ընդհանուր իրավասության դատարանն այսօր ավարտեց էքստրասենս Անի Մաջնունյանի սպանության գործով ապացույցների հետազոտումը:
Հետազոտվող ապացույցների թվում էին սպանվածի եւ սպանությունը կատարելու համար մեղադրվողի տնից առգրավված իրեր, որոնք իրեղեն ապացույցներ չէին ճանաչվել, բայց մեղադրյալի պաշտպանի միջնորդությամբ դրանք բացվեցին՝ հետազոտվելու համար:
Հետազոտվող իրերից էին Մխիթարյանի նոթատետրը, որտեղ բացառապես գործնական գրառումներ էին, նրա գործունեությանը վերաբերող փաստաթղթեր, կնիք, Անի Մաջնունյանի դրամապանակը, պլանշետը:
Սպանության մեջ մեղադրվող Մուշեղ Մխիթարյանի պաշտպան Մարինե Ֆարմանյանն էլ միջնորդեց հետաձգել նիստը, որ պատրաստվեն դատաքննությունը լրացնելու վերաբերյալ միջնորդություններին: Դատական նիստը հետաձգվեց, հաջորդը նշանակվեց դեկտեմբերի չորսին:
Հիշեցնենք, որ Մուշեղ Մխիթարյանին մեղադրանք է առաջադրվել, որ նա ապօրինաբար Անի Մաջնունյանին դիտավորությամբ կյանքից զրկել է, որը զուգորդվել է ավազակությամբ:
Արփինե ՍԻՄՈՆՅԱՆ
