Այս տարվա փետրվարին կոսմետիկ միջոցների շուկայում ուսումնասիրության արդյունքում պարզվել է, որ կոսմետիկ միջոցներ ներկրող մեծ ընկերությունների 90%-ը սերտիֆիկատ չի ունեցել: Այս մասին այսօր «Արմենպրես» ակումբում ասաց տնտեսական զարգացման եւ ներդրումների նախարարության շուկայի վերահսկողության տեսչության պետ Լեւոն Խալիկյանը: Ըստ նրա, տեսչությունն արգելել է սերտիֆիկատ չունեցող ապրանքների վաճառքը:
Խալիկյանի ներկայացմամբ՝ այս տարի նշված շուկան ուսումնասիրել են, քանի որ նախորդ տարի քաղաքացիներից բողոքներ են ստացել, որ որոշ կոսմետիկ միջոցներ օգտագործումից հետո ալերգիկ ռեակցիա եւ մաշկային ցան է առաջացել, ուստի տեսչությունը որոշել է ստուգումներ իրականացնել, եւ հատկապես խոշոր ներմուծողների շրջանում, եւ արդյունքում ընդամենը մեկ ընկերության մոտ տեսչությունը որեւէ տեսակի խախտում չի հայտնաբերել:
Խալիկյանի խոսքերով՝ 2017 թվականից ուժի մեջ է մտել ԵԱՏՄ կանոնակարգը , եւ այս նոր կանոնակարգի մասին բոլոր տնտեսվարողները տեղեկացվել են:
Խալիկյանը հորդորում է՝ ոչ պարենային ապրանք գնելիս, անպայման սերտիֆիկատ պահանջեք, եթե այն ունի սերտիֆիկատ, ուրեմն անվտանգ է, քանի որ սերտիֆիկատ տալիս են Հայաստանում գործող համապատասխան լաբորատորիաները:
Ըստ Խալիկյանի՝ ուսումնասիրել են նաեւ խաղալիքների շուկան, որտեղ եւս խախտումներ են հայտնաբերել: Օրինակ՝ խաղալիք ներկրողների 70%-ը սերտիֆիկատ չի ունեցել: Խալիկյանի խոսքերով՝ խաղալիքների ոլորտը հատկապես ռիսկային է Ամանորից եւ ուսումնական տարվա մեկնարկից՝ սեպտեմբերի մեկից առաջ.«Սպառողին խորհուրդ ենք տալիս ապրանքը գնելիս սերտիֆիկատ պահանջել»:
Նելլի ԲԱԲԱՅԱՆ
