«Ազատ, անկախ ու-սա-նո’ղ»,- այս վանկարկումներով տարկետման իրավունքի սահմանափակման դեմ բողոքող ուսանողների դասադուլն ու բողոքի ցույցը շարունակվում է:
Ուսանողները եղան նաեւ Կոնսերվատորիայում: Միացեք, միացեք վանկարկելով՝ նրանք կոչ էին անում Կոմիտասի անվան կոնսերվատորիայի պրոֆեսորադասախոսական կազմին ու ուսանողներին միանալ իրենց ակցիային: Տեսնելով, որ չեն արձագանքում՝ դասադուլավորները փորձեցին անգամ մուտքի մոտ երգել կամ երգեցիկ տոնով ասել՝ «Միի-աաա-ցեեք», որ գրավեին նրանց ուշադրությունը:
Հետո ուսանողները հավաքվեցին կոնսերվատորիայի դիմացի այգում, բաժանվեցին խմբերի եւ որոշեցին, թե որ բուհում ինչ աշխատանքներ է պետք կատարել, որ ավելի շատ մարդկանց ներգրավեն:
Որոշվեց տեսահոլովակներ պատրաստել, առցանց իրազեկման ցույցեր կազմակերպել, անգամ, իրավաբանների ներգրավել, որոնք իրենց կբացատրեն, թե ցույցերի ժամանակ ինչ է պետք է անել ու ինչ չանել, որ եթե ոստիկանները խոչընդոտեն՝ իմանան իրենց անելիքները:
«Հանուն գիտության զարգացման» նախաձեռնության անդամ Դավիթ Պետրոսյանը հուսադրեց ուսանողներին, որ անպայման հաջողություն կունենան, եթե աշխատեն եւ իրենց գաղափարական պայքարից հետ չկանգնեն: Նա ասաց, որ չպետք է կարճաժամկետ հաջողությունների վրա հույսը դնել եւ բավարարվել. «Հավատում եք, չէ՞, ժողովուրդ, որ մենք շատ մեծ փոփոխություն արել ենք արդեն»: Ըստ Դավիթ Պետրոսյանի, այն, որ իրենց դեմ ոչ ոք չի կարողանում հակափաստարկներ բերել, բուհերից իջնել եւ բանավիճել, ցույց է տալիս, որ իրենք ճիշտ են:
Ուշագրավ է, որ բողոքի ակցիայի ժամանակ Ճարտարապետաշինարարական համալսարանի՝ Պոլիտեխնիկի ռադիոֆակուլտետի 1-ին կուրսի ուսանողներից մեկին՝ Ավետիսյան Արմանին զանգահարեց դեկանը, այնուհետեւ դեկանատից եւ զգուշացումներ արեցին, թե շատ բացակայությունների դեպքում կրթական թոշակից կզրկվես: Ուսանողի խոսքով՝ «Դեկանն ասաց, որ ես էլ եմ դեմ նրան, որ տարկետումն ուզում են հանեն»: Ուսանողն ասել է, որ եթե ես դասադուլի եմ մասնակցում, ի՞նչ է նշանակում զրկել ինձ թոշակից, իրավունքներ եմ պաշտպանում դասադուլով: Դեկանն ասել է, որ «ես կողմ եմ, որ դուք մասնակցեք դասադուլին», բայց մյուս կողմից էլ զգուշացրել է թոշակից զրկվելու վտանգի մասին:
Հռիփսիմե ՋԵԲԵՋՅԱՆ
