ԵՊՀ դասախոս, կրթության փորձագետ Սերոբ Խաչատրյանը մտահոգություն ունի, որ Զինապարտության մասին օրենքով կրթությունը ստորադասվում, երկրորդացվում է: «Հոդված 3» ակումբում անդրադառնալով Զինապարտության մասին օրենքին` նա նշեց. «Նախկինում կրթության ոլորտին տրվում էր որոշակի վստահության քվոտա: Ասում էին՝ հարգելի ԳԹԿ, ես քեզ հնարավորություն եմ տալիս տարեկան 7 հոգու ընդունել տարկետման իրավունքով բուհ, հետո բուհեր, կարող եք պահել տարկետման իրավունքը մագիստրատուրայում, հետո 100-140-ին տարկետման իրավունքով կպահեք ասպիրանտուրայում: Հիմա ՊՆ-ն այս օրենքով ասում է, որ ես չեմ վստահում ՀՀ ԿԳ նախարարության և համալսարանների քաղաքականությանը»:
Պարոն Խաչատրյանի բնութագրմամբ՝ հիմա ՊՆ-ն ասում է՝ կամ գնում եք ուղիղ բանակ, կամ գալիս ՊՆ, կնքում պայմանագիր, շաբաթ օրերն էլ սովորում ռազմական բուհում: Ըստ փորձագետի՝ սա ևս խնդիր է, ուսանողները աշխատանքային օրերին սովորեն, աշխատեն, շաբաթ օրերն էլ գնան ռազմական բուհ:
Սերոբ Խաչատրյանը կրթության ստորադասման ևս մեկ փաստ է օրինակ բերում՝ Փոքր Մհեր կրթահամալիրի՝ ԿԳՆ-ի վերահսկողությունից հանելը: Նա ամփոփեց. «Տեղի է ունենում կրթության երկրորդացման, ստորադասման գործընթաց»: Ըստ նրա՝ նոր օրենքով մարդիկ կստանան տաղանդավորի պիտակն ու իրենց խնդիրը կլուծեն:
ԵՊՀ գիտական քարտուղար Մենուա Սողոմոնյանի կարծիքով՝ նոր օրինագիծը էական, լուրջ վնաս գիտությանը չի հասցնի: Ըստ նրա՝ ավելի լուրջ խնդիր է գիտության ֆինանսավորման կրճատման հարցը. «Բանակ զորակոչվելու են առաջին կուրսից, իսկ այդ փուլում հետազոտական լուրջ գործընթաց չի ծավալվում»:
Տաթև ՀԱՐՈՒԹՅՈՒՆՅԱՆ
