Այսօր տարկետման իրավունքի սահմանափակման դեմ բողոքող ուսանողները շրջեցին ԵՊՀ տարբեր ֆակուլտետների, տարբեր բուհերի մոտով եւ փորձում էին իրազեկման ցույց անել, թռուցիկներ բաժանել:
Երեւանի պետական տնտեսագիտական համալսարանի մուտքը դասադուլ անող ուսանողների առջեւ փորձում էին փակել բուհի անվտանգության աշխատողները: Ուսանողներից մի քանիսին հաջողվեց ներս մտնել, սակայն մուտքի մոտ նրանց դիմավորեցին բուհի որոշ ուսանողներ եւ սկսեց «տղայական» խոսակցություն: Նրանք ուզում էին խոչընդոտել ցուցարարերի մուտքը՝ իրենց բուհի տարածք՝ ասելով, որ իրենք լիազորված են ուսանողների անունից, դասապրոցեսը խաթարվում է, մի եկեք:
Այդ բուհի առաջին կուրսի ուսանողներից մեկին հաջողվեց ներս մտնել եւ դասադուլավորների անունից հայտարարություն անել:
Ուսանողները ցույցը շարունակում են:
Ագրարային համալսարանի պրոռեկտորը մուտքի մոտ սպասում էր դասադուլավորներին: Նա հսկում էր մուտքը, որպեսզի ցուցարարները ներս չմտնեն:
Ճարտարապետաշինարարական համալսարանի՝ Պոլիտեխնիկ ինստիտուտի մուտքի մոտ նույնպես նախապես կանգնել էին անվտանգության աշխատողներ, ոստիկաններ, ուսխորհրդի անդամներ՝ ցուցարարներին ընդդիմանալու, նրանք պատ էին կազմել: Բուհի անվտանգության ծառայության պետն ասաց. «Իրազեկեք, կանգնեք իրազեկեք, բայց մի՛ խանգարեք մեր դասերը»:
Բուհի ուսխորհրդի նախագահ, ՀՀԿ կուսակցության անդամ Հովսեփ Հովեյանն ասաց, որ ցուցարարների այս մոտեցումը չի կիսում, ինքը պաշտպանության նախարարի հետ հանդիպում-քննարկմանը մասնակցել է, իրենց հուզող հարցերը տվել է եւ այդ ձեւաչափն է իրենց համար ընդունելի: Ուշագրավ է, որ ուսխորհրդի այս նախագահն ինքն օգտվում է բուհական տարկետման գործող կարգից եւ առանց բանակում ծառայելու՝ շարունակական կրթություն է ստանում:
Ուսխորհրդի նախագահի խոսքով՝ «Ես դեռ սովորում եմ»: Նա ասպիրանտուրայի ուսանող էր: Երբ լրագրողները հիշեցրին նրան Շարմազանովի խոսքերը, որ ասպիրանտուրայում սովորել՝ չի նշանակում, որ պետք է գիտնական լինեն՝ Հովեյանը պատասխանեց, որ «թեկնածուականը պաշտպանելուց հետո կհասկանամ գիտությունը ի՞մն է, թե՞ ես պետք է գիտաշխատող լինեմ»:
Հռիփսիմե ՋԵԲԵՋՅԱՆ
