Ավան եւ Նոր Նորք վարչական շրջանների ընդհանուր իրավասության դատարանում այսօր՝ 2016թ. ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամներից Պավել Մանուկյանի, Վարուժան Ավետիսյանի, Մխիթար Ավետիսյանի, Արայիկ Խանդոյանի, Գագիկ Եղիազարյանի, Արմեն Բիլյանի, Արեգ Կյուրեղյանի, Սմբատ Բարսեղյանի, Սեդրակ Նազարյանի եւ Էդվարդ Գրիգորյանի գործով հերթական դատական նիստն է: Մեկնարկին դատավոր Մեսրոպ Մակյանն արձանագրեց, որ պաշտպաններից ոմանք ներկա չեն, սակայն դա նիստը շարունակելու խոչընդոտ չէ:
Ամբաստանյալների պաշտպաններից Հայկ Ալումյանը ներկայացրեց «Սասնա ծռերի» գործով երեք անջատ մասերն իրար միացնելու, ասել է թե՝ գործի մեկ քննություն իրականացնելու միջնորդություն: Փաստաբանը նշեց, որ գործերը միացնելը բխում է արդար դատաքննությունից. բացի այդ, խնդիրներ կառաջանան, եթե, օրինակ, նույն վկան տա երեք տարբեր ցուցմունքներ:
Ապա Հայկ Ալումյանը հրաժարվեց միջնորդությունից՝ ասելով՝ չգիտեր, որ ամբաստանյալների մի մասը համաձայն չէ իրենց պաշտպանների բացակայության պայմաններում նիստը շարունակել:
«Մի ստիպեք ինձ դուրս գալ նիստերի դահլիճից: Խնդրում եմ՝ մեզ ծայրահեղ քայլերի մի դրդեք»,-դատավորին ասաց Ալումյանը:
Մակյանն էլ պնդեց, որ դա խոչընդոտ չէ այս պահին, բացի այդ, նիստի մեկնարկին բացակա կողմերի անունները հայտարարվել են:
Ապա նիստն ընդմիջվեց՝ բացակա պաշտպաններին սպասելու նպատակով:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
