Արդեն չորրորդ օրը դասադուլ հայտարարած ուսանողներին չհաջողվեց մասնակցել ՀՀ ԱԺ պաշտպանության և անվտանգության հարցերի մշտական հանձնաժողովի նիստին, թեև նրանք 17.00-ից գտնվում էին խորհրդարանի շենքի մոտ: Նշենք, որ հենց այդ հանձնաժողովի նիստում քննարկվելու է «Զինվորական ծառայության և զինծառայողի կարգավիճակի մասին» օրենքի նախագիծը: Ժամը 18.00-ին նշանակված նիստը քվորում չլինելու պատճառով ի վերջո հետաձգվեց:
Հանձնաժողովի նախագահ Ալիկ Սարգսյանը պարզաբանեց, թե ինքը որպես հանձնաժողովի նախագահ իրավունք չունի կանոնակարգը խախտել և ներս թողնել մարդկանց, որոնք այդ իրավունքը չեն ունեցել:
Մինչ խորհրդարանի ներսում հանձնաժողովը նման քննարկումներ է անում, դրսում ուսանողները քննարկում են ինչ կարելի է անել: Նրանց չհաջողվեց նամակը փոխանցել հանձնաժողովին, ոչ մի խմբակցության հետ չկարողացան կապ հաստատել:
Ուսանողներն իրենց նամակը կարողացան փոխանցել միայն Ելք խմբակցության անդամներին: Խորհրդարանի մոտ էին Դավիթ Խաժակյանն ու Արարատ Միրզոյանը: Արարատ Միրոյանն ասաց, որ ինքը նամակը կտանի վերև:
Ուսանողներն իրենց նամակում առաջարկում են բակալավրիատի ընդունելության խիստ ընթացակարգեր, սահմանափակել տարկետման տեղերը բակալավրիատում , ինչպես նաև, որ օրենքը չտարածվի ներկայումս բակալավրիատում և մագիստրատուրայում սովորող ուսանողների վրա: Նրանք առաջարկում են, որ եթե ներկայումս ասպիրանտուրայում սովորող ուսանողների տարիքը ավարտելուց հետո 27-ից ցածր լինի, նրանք չզորակոչվեն բանակ: Առաջարկ կա նաև սառեցնել զինապարտության մասին օրենքի քննարկումները և դա անել բարձագույն կրթության մասին օրենքի հետ միասին:
Այս պահին ուսանողները ԱԺ ծառայողական մուտքի մոտ՝ Դեմիրճյան փողոցի կողմից, սպասում են պատգամավորներին: Ցուցարարները տեղեկություններ ունեն, որ նիստը երկուշաբթի է կայանալու:
Տաթև ՀԱՐՈՒԹՅՈՒՆՅԱՆ
