Քիչ առաջ ՀՀ Սահմանադրական դատարանը հակասահմանադրական ճանաչեց ՏԻՄ մասին ՀՀ օրենքի 64-րդ հոդվածի 3-րդ կետը: Հիշեցնենք, որ ԱԺ «Ելք» եւ «Ծառուկյան դաշինք» խմբակցությունների 26 պատգամավորներ դիմում էին ներկայացրել ՍԴ, որով պահանջում էին չեղարկել Վանաձորի համայնքի ավագանու ՀՀԿ եւ ՀՅԴ խմբակցությունների անդամների կողմից ընդունած որոշումները: ՍԴ-ն բավարարեց հայցը:
Վանաձորի քաղաքապետ Մամիկոն Ասլանյանը Aravot.am-ի հետ զրույցում ասաց, որ թեեւ ՍԴ-ն հակասահմանադրական է ճանաչել օրենքը, սակայն իրենց ընդունած որոշումները հակաօրինական չեն. «Դատարանը գտել է, որ 64-րդ հոդվածի 3-րդ կետը հակասահմանադրական է, եւ բնականաբար, եթե դա հակասահմանադրական է ճանաչվում, դրանից բխող իրավական հետեւանքներն էլ պետք է վերացվեն, իսկ դրանք մեր կայացրած նիստերով ընդունված որոշումներն են: Գործողության ժամկետը թողել է մինչեւ մարտի 31-ը, որպեսզի իրավական վակում չառաջանա: Իսկ ԱԺ-ին ժամկետ է տրվել, որ ՏԻՄ օրենքի մեջ փոփոխություն կատարի ու հստակեցնի: Էդ պահին գործող օրենքը դա է եղել եւ մենք առաջնորդվել ենք գործող օրենքով, հետեւաբար մեր գործողությունների մեջ որեւէ հակաօրինական բան չկա: Իսկ եթե օրենքի մի կետ է ճանաչվում հակասահմանադրական, բնականաբար դրանից բխող իրավական հետեւանքներն էլ պետք է վերացվեն: Այդ կոնտեքստում պետք է նայվի, ոչ թե մեր նիստերը կամ մեր ընդունած առանձին որոշումները, որովհետեւ դրանք բխել են օրենքից, իսկ այդ պահին գործող օրենքը չի հակասել մեր ընդունած որոշումներին»:
Այն հարցին, թե ի՞նչ է կարծում, նոր ընտրություններ կլինեն թե՞ ոչ, քաղաքապետը պատասխանեց. «Այս ընդունած որոշման տրամաբանությունից դա չի բխում, որովհետեւ «Լուսավոր Հայաստանի» տված հայցերից մեկը, որը վերաբերում էր նոր ընտրություններին, մերժվել էր: Իրենք 69 հոդվածն էլ էին վիճարկում, որ պետք է ավագանու լիազորությունները կրճատեն, քանի որ նիստեր չեն գումարել: Բայց այդ մասով ՍԴ-ն մերժել է, քանի որ մեր գումարած նիստերն օրենքին համապատասխան են եղել»:
Նշենք նաեւ, որ նոյեմբերի 23-ին նախատեսված է ավագանու հերթական նիստ: Իսկ կկայանա, թե՞ ոչ, Ասլանյանը դեռ չգիտի, ՍԴ-ի որոշմանն են սպասում «Մենք, որ ՍԴ-ի որոշումն ու իրավաբանական մեկնաբանությունները ստանանք, այդ ժամանակ կհասկանանք, թե մինչեւ մարտի 31-ն ինչպես պետք է գործենք»:
Տաթեւիկ ՂԱԶԱՐՅԱՆ
