«Մեր պահանջն ամբողջությամբ բավարարվեց՝ համաձայն ՀՀ Սահմանադրության նորմերին»,-Սահմանադրական դատարանում լրագրողների հետ զրույցում ասաց ԱԺ «Ելք» խմբակցության պատգամավոր Արտակ Զեյնալյանը՝ մեկնաբանելով դատարանի այսօրվա որոշումը, որով Վանաձոր քաղաքի ավագանու նիստերն ու որոշումները ճանաչվել են ապօրինի՝ հակասահմանադրական:
«Սա պատգամ է քաղաքական մեծամասնությանը, որը չի կարող շեղվել այս հանձնարարականից եւ պետք է փոփոխություններ կատարի «Տեղական կառավարման մասին» օրենքում: Տեսնենք՝ ՍԴ որոշման կատարումն ինչպե՞ս կդրսեւորվի»,-հարցադրում արեց Արտակ Զեյնալյանը:
Նույն խմբակցության պատգամավոր Էդմոն Մարուքյանն էլ իր հերթին հարց բարձրացրեց. «Առաջիկայում պարզ կլինի՝ ՀՀԿ-ն հարգո՞ւմ է ՍԴ որոշումը, թե շարունակելու է ապօրինությունները: Վանաձորի փոքրամասնության քաղաքապետը եւ նրա փոքրամասնությունը ապօրինություններ են գործում շուրջ մեկ տարի»:
Մարուքյանը նաեւ համոզմունք հայտնեց, որ Վանաձորի գործող քաղաքապետ Մամիկոն Ասլանյանը ՍԴ որոշումները մեկնաբանել չի կարող:
Լուիզա ՍՈՒՔԻԱՍՅԱՆ
