ԵՊՀ տնտեսագիտության եւ կառավարման ֆակուլտետի դեկան, տնտեսագիտության դոկտոր, պրոֆեսոր, Հանրային Խորհրդի անդամ Հայկ Սարգսյանը Aravot.am-ի հետ զրույցում նշեց. «Կարծում եմ` 18 տարեկանը չպետք է լինի սահմանագծին, ընդ որում այդ հնարավորություններն ընձեռված են օրենքով: Նա կարող է պայմանագրային հիմունքներով շարունակել իր ուսումը բակալավրիատում: Չեմ կարծում, թե նպատակահարմար է, որ 18 տարեկան որպես զինվոր չկայացածը սահմանի վրա լինի եւ այսօրվա ոչ արդիական տեխնոլոգիաներով մեր սահմանագիծը պահի»:
Ինչ վերաբերում է կրթության անընդհատության գաղափարին, պարոն Սարգսյանի համոզմամբ, որոշ դեպքերում, իսկ դա բնագիտական կրթությանն է վերաբերվում, պետք է տաղանդաշատ ուսանողների կրթության անընդհատությունը պահել: «Նման ուսանողները կարող են 100-200 հոգի լինել, այդ հնարավորությունը պետք է ապահովվի նրանց համար: Կարծում եմ, որ երկրորդ ընթերցման պարագային օրենքի ուժով այդ հնարավորությունը կընդգծվի: Ինքս Մոսկվայի Լոմոնոսովի անվան համալսարանն ավարտելուց հետո, հանգամանքների բերումով չեմ գնացել զինվորական ճամբար, հույս չունեի, որ ինձ կպահեն ասպիրանտուրայում: Սակայն ասպիրանտուրա ընդունվեցի, ու որպես զինվոր ծառայեցի բանակում: Բայց նման օրինակները չպետք է ընդհանրացնել: Հատկապես բնագիտական առարկաների մի որոշակի սեգմենտի համար կրթության անընդհատությունը անհրաժեշտություն է»,-հայտնեց ԵՊՀ տնտեսագիտության եւ կառավարման ֆակուլտետի դեկանը:
Գոհար ՀԱԿՈԲՅԱՆ
Հայկ Սարգսյանի հարցազրույցի մանրամասները նոյեմբերի 11-ի տպագիր «Առավոտում»:
Լուսանկարը` 168.am-ի:
