Այսօր նոյեմբերի 10-ին, պետք է կրկին աճուրդի հանվեր ՀՀ առաջին նախագահ Լեւոն Տեր-Պետրոսյանին սպասարկած ավտոմեքենան, սակայն ինչպես տեղեկացանք, կրկին աճուրդը չի կայացել` հայտատուի բացակայության պատճառաբանությամբ:
ՀՀ ԿԱ պետական գույքի կառավարման վարչությունից Aravot.am-ի հարցին ի պատասխան, հայտնեցին, որ այս անգամ էլ հայտատուներ չեն եղել:
Հիշեցնենք, որ ՀՀ առաջին նախագահի ավտոմեքենան արդեն մի քանի ամիս է, ինչ կառավարության որոշմամբ աճուրդի է հանված: Այն 1982 թվականի արտադրության «Մերսեդես Բենց 500 ՍԵԼ» մակնիշի է: Մեկնարկային գինը եղել է 17 մլն դրամ: Սակայն ամեն աճուրդից հետո, գնորդ չլինելու պատճառով, գինն իջել է: Այսօր ավտոմեքենայի գինն արդեն 10 մլն 880 հազար դրամ էր:
Պետգույքից հայտնեցին, որ հաջորդ աճուրդը նախատեսված է նոյեմբերի 27-ին` 8 մլն 704 հազար դրամով:
Լուսինե ԲՈՒԴԱՂՅԱՆ
