Ռուս հասարակական գործիչ, քաղաքական հետազոտությունների ինստիտուտի տնօրեն Սերգեյ Մարկովն օրերս անդրադարձել է այնպիսի թեմայի, որը Հայաստանում խիստ բացասական արձագանք է ունեցել: Նա, նախ, կարծիք է հայտնել, թե Հայաստանը կարծես գնում է Ուկրաինայի ճանապարհով, ապա խոսել Նժդեհից ու Դրաստամատ Կանայանից: «Հայաստանում հերոսացվում են Գարեգին Նժդեհը և Դրաստամատ Կանայանը, որոնք մի քանի անգամ պայքարել են Ռուսական կայսրության և ԽՍՀՄ կարգերի դեմ: Իսկ Նժդեհը համագործակցել է նացիստական Գերմանիայի հետ»,- նշել է հայոց պատմությունը սեփական ճաշակով վերաձևած Մարկովը` անգամ սպառնալով Հայաստանի իշխանություններին, որ հանեն Նժդեհի արձանը, հակառակ դեպքում ցեղասպանության վտանգի դեպքում չդիմեն Ռուսաստանի աջակցությանը:
Այսպիսի ցինիկ հայտարարություններին խիստ քննադատաբար են մոտենում նաև հայ այնպիսի գործիչներ, որոնք ռուսական կողմնորոշում ունեն: «Իրատեսը» այս թեմայի շուրջ մի քանի հարց ուղղեց ԱԺ ՀՀԿ խմբակցության անդամ ԱՐՏԱՇԵՍ ԳԵՂԱՄՅԱՆԻՆ:
-Ինչպե՞ս եք վերաբերվում նման հայտարարություններին:
-Նախ` դա բացառապես Հայաստանի Հանրապետության ներքին գործն է: Երկրորդ` ոչ մեկը բարոյական իրավունք չունի մեր ազգային հերոսի սխրանքը, որը ժամանակին փրկել է Զանգեզուրը թուրք-ազերիական յաթաղանից, կասկածանքի տակ դնելու: Ավելին, դեռ դասեր տալ ՀՀ իշխանություններին, ժողովրդին, թե ինչպես վերաբերվել սեփական հերոսներին:
-Հայկական կողմը պաշտոնական մակարդակով պատշաճ պատասխան տվե՞ց այս հայտարարությանը:
-Եթե հանրապետության նախագահի մակարդակով ամենակոշտ գնահատականն է տրվում այդ երևույթին, այն էլ Ռուսաստանի Դաշնային ժողովի պատվիրակության ղեկավարի և անդամների անմիջական ներկայությամբ, դրանից ավելի ինչ անեինք, հայհոյեի՞նք:
Ռուզան ԽԱՉԱՏՐՅԱՆ
Հոդվածն ամբողջությամբ՝ «Իրատես» թերթի այսօրվա համարում
