Ռեժիսոր. «Կինոհանձնակատարի գաղափարը խեղաթյուրելու դեպքում անկիրառելի կդառնա»

Aravot.am-ը ռեժիսոր Դավիթ Մաթեւոսյանից, որը  խոսել էր ՀՀ կինեմատոգրաֆիայի մասին օրենքի  նախագծի խութերի մասին, հետաքրքրվեց` իր կարծիքով խեղաթյուրված չէ՞ կինոհանձնակատարի գաղափարը եւ արդյոք օրենքի նախագծի ներկայիս տեսքով հնարավոր չի՞ լինի կամայական որոշումների կայացումը:

«Կինոհանձնակատարի գաղափարը, որպես այդպիսին, պարբերաբար շրջանառվող ռեֆորմների, առաջարկների մեջ բերվում է բավականաչափ կառուցիկ եւ ճշգրիտ տեսքի: Դա լավ գաղափար է, եւ վաղուց պետք է ունենայինք: Ճիշտն ասած, այդ բառից  եմ դժգոհ…»,-ասաց ռեժիսորը:

Ապա հավելեց, որ կինոհանձնակատարը, անգլերեն ասած՝ Film commissions-ն  է, որը պետք է  զբաղվի ֆինանսական միջոցներ ներգրավելով, արտասահմանյան ֆիլմերի սպասարկու ծառայություններով եւ այլն:

Մեր զրուցակիցը  կարծում է, որ պետք է հստակ ամրագրված լինեն կինոհանձնակատարի իրավասությունները, իրավունքները, պարտականություններն ու անելիքները, այլապես կունենանք հերթական խեղումը:

Դավիթ Մաթեւոսյանը անդրադարձավ նաեւ Հայաստանի կինեմատոգրաֆիստների միության նախագահ Հարություն Խաչատրյանի` օրենքի վերաբերյալ մտահոգություններին: Պարոն Խաչատրյանը մասնավորապես անհանգիստ էր, որ ազգային կինո ասվածը հետին պլանում է, իսկ տեղական կինոարտադրողների իրավունքները՝ բարձիթողի: Նա նաեւ մտահոգ էր, որ ազգային կինոյի գումարները ներդրվեն տեղական ֆիլմարտադրության մեջ:

«Այսօր գիլդիաներ ստեղծելով` պետք է փորձենք պաշտպանել  տեղական կինոարտադրողի, ռեժիսորի, դերասանի, բոլորի պրոֆեսիոնալ ինքնադրսեւորման իրավունքը: Ասածս այն է, որ ցանկացած հասկացություն, ներառյալ  կինոհանձնակատարինը, խեղաթյուրելու դեպքում կարող է դառնալ անկիրառելի, այդպիսով, կարող ենք ունենալ Կինոյի մասին օրենքի չգործող տարբերակ, որը եւս 5-6 տարով ամեն ինչ հետ կգցի»,- հայտնեց ռեժիսորը:

Դավիթ Մաթեւոսյանը ողջունելի է համարում, իր ձեւակերպմամբ, մշակույթի նախարարի դրական վերաբերմունքը ցանկացած ռեֆորմի իրականացման  նկատմամբ եւ առողջ ուժերին ի մի բերելու եւ ականջալուր լինելու` նրա  քայլերը. «Իմ տպավորությամբ նախարարը սիրում է երիտասարդ, գրագետ միավորների հետ աշխատել, ինչը ողջունելի է»:

 Գոհար ՀԱԿՈԲՅԱՆ