Նոյեմբերի 9-ին «Հենարան» ակումբում կրթության փորձագետ Սերոբ Խաչատրյանը անդրադառնալով «Զինվորական ծառայության և զինծառայողի կարգավիճակի մասին» ՀՀ օրենքի նախագծի տարկետման դրույթի դեմ ուսանողների պայքարին, կարծիք հայտնեց, որ պայքարի ձեւը օրենքին համապատասխան է, եթե ամեն ինչ արվում է կամավորության սկզբունքով: Սակայն բանախոսը միաժամանակ նշեց, որ ուսանողության պայքարն այլեւս ուշացած է:
Կրթության փորձագետի ձեւակերպմամբ, եթե օրինագիծն անցնի, պաշտպանության նախարարությունը պետք է ստանձնի մանկավարժահոգեբանական գործառույթ, որպեսզի ծառայող տղաները «չկոտրվեն» եւ զորացրվելուց հետո ցանկություն ունենան գիտությամբ զբաղվելու:
Սերոբ Խաչատրյանի համոզմամբ, օրենքն ամենաշատը բացասաբար կանդրադառնա ավագ դպրոցների վրա, որտեղ սովորող մեծաթիվ տղաները ձգտում են բարձր միավորներով ընդունվել պետական բուհեր: Ու քանի որ, օրենքի ընդունումից հետո այլեւս չեն կարողանալու օգտվել տարկետման իրավունքից, նրանց կբավարարի նվազագույնի շեմի հաղթահարմամբ բուհ ընդունվելը: Ըստ փորձագետի, ԿԳ նախարարությունը պետք է միջոցներ ձեռք առնի ավագ դպրոցներում սովորող տղաներին մոտիվացնելու համար:
Սերոբ Խաչատրյանը, ի տարբերություն այլոց, «Զինվորական ծառայության և զինծառայողի կարգավիճակի մասին» ՀՀ օրենքի նախագծում դրական բաներ էլ է տեսնում, թեկուզ հենց այն, որ ուսման վարձը փոխհատուցվելու է:
Գոհար ՀԱԿՈԲՅԱՆ
