Աշխարհահռչակ ռոք երաժիշտ Սերժ Թանկյանը կոչ է արել Հայաստանին հեռու մնալ ամերիկյան «Մոնսանտո» ընկերությունից, որը բույսերի բիոտեխնոլոգիաների համաշխարհային առաջատար է համարվում:
Այսօր կառավարության նիստից հետո սննդի անվտանգության պետական ծառայության նախագահ Իշխան Կարապետյանից Aravot.am-ը հետաքրքրվեց՝ թե ի՞նչ կարծիք ունի երաժշտի հայտարարության մասին, եւ արդյոք ՍԱՊԾ-ն պատրաստվում է «Մոնսանտո» ընկերության ապրանքների մուտքը Հայաստան արգելել:
Պարոն Կարապետյանն ասաց, որ այդ ընկերության արտադրած ապրանքները միջնորդ ընկերությունների միջոցով վաղուց իրացվում են Հայաստանում. «Ներկայումս, համաձայն տվյալների, ընկերության կողմից ներկրված սերմերի ծավալը չի գերազանցում մեկ տոկոսը ներկրման ընդհանուր սերմերի ծավալի։ Ես չեմ կարծում, որ այս պահի դրությամբ դա մեծ ռիսկ է պարունակում»:
Մեր այն հարցին՝ արդյոք Կարապետյանը որպես սպառող եւ քաղաքացի օգտագործում է ԳՄՕ սնունդ, վերջինս պատասխանեց. «Ես որպես քաղաքացի չեմ գտնում, որ ԳՄՕ պարունակող սննդամթերքը կամ դրա տարրերը նպատակահարմար է իրացնել Հայաստանի Հանրապետությունում»:
Ըստ Կարապետյանի, գենետիկորեն ձեւափոխված օրգանիզմների մասով գիտության մեջ կան տարբեր քննարկումներ եւ մինչ օրս բանավեճերը շարունակվում են՝ գենետիկորեն մոդիֆիկացված օրգանիզմների վնասակար հատկությունների ազդեցությունը մարդու կյանքի եւ առողջության վրա, թե՞ դրա առավելությունները գյուղատնտեսության զարգացման տեսանկյունից:
Մանրամասն՝ տեսանյութում
ՍԱՊԾ-ի ղեկավարն ասաց, որ 2018 թվականին իրականացնելու է լայնածավալ մոնիտորինգային ծրագրեր, եւ արդյունքներն ամփոփելուց հետո նոր կկարողանա ներկայացնել այդ ոլորտի ամբողջական պատկերը:
Նելլի ԲԱԲԱՅԱՆ
