Ֆիզիկական կուլտուրայի հայկական պետական ինստիտուտում առաջին անգամ ուսանողական մարզական խաղերի ծրագրով անցկացվեց պաուերլիֆթինգի մրցաշար, որը Խաղերի ծրագիր մտցվել է ՀՀ սպորտի եւ երիտասարդության հարցերի նախարարության նախաձեռնությամբ:
Մասնակցեցին Երեւանի, Գյումրիի, Վանաձորի, հանրապետության մարզերի շուրջ 15 բուհերի ուսանող մարզիկներ (տղաներ եւ աղջիկներ), որոնք մրցեցին սեղմում պառկած դիրքից վարժությունում:
Միավորների ընդհանուր հաշվարկով թիմային պայքարում մրցանակային եռյակը կազմվեցին ՀԱՊՀ-ի, Ֆիզիկական կուլտուրայի ինստիտուտի եւ ԵՊՀ թիմերը:
Հայաստանի պաուերլիֆթինգի ֆեդերացիայի նախագահ Գագիկ Սարոյանն Aravot.am-ին ասաց, որ մասնակիցների քանակը գերազանցում է 200-ի սահմանը եւ ըստ ամենայնի մարզաձեւը ապագայում իր արժանի տեղը կունենա նաեւ ուսանողական մարզական խաղերում: Ուսանող մարզիկները մրցեցին սեղմում պառկած դիրքից վարժությունում, եւ տեսանք, որ բավականին շարժ կա թե արդյունքների, թե մասնակցության առումով: Իհարկե, եղան նաեւ ուսանողներ, որոնք առաջին անգամ իրենց կարողությունները փորձեցին: Բնական է, որ նրանց արդյունքները բարձր չէին: Սակայն կարեւորը մասնակցությունն էր: Ուրախալի է նաեւ, որ բավականին ակտիվություն զգացվեց նաեւ աղջիկների մեջ, ինչն անշուշտ ողջունելի է», – ասաց Գագիկ Սարոյանը:
Ֆեդերացիայի նախագահը նաեւ հատուկ նշեց, որ մրցմանը մասնակցելու թույլտվություն ստացել են միայն նրանք, ովքեր այս մարզաձեւով զբաղվում են իրենց բուհերում, մասնակցել են ներբուհական մրցումների եւ ընդգրկվել իրենց թիմերի կազմեր:
Աշոտ ՀԱԿՈԲՅԱՆ
