«Ստում են՝ ինձ գունավոր մատիտներ չեն տվել». գեղանկարիչ «Սասնա ծուռը»՝ դատավորին

2016թ. ՀՀ ոստիկանության ՊՊԾ գունդը գրաված եւ մի շարք ծանր հանցագործությունների մեջ մեղադրվող «Սասնա ծռեր» խմբի անդամներից Արմեն Լամբարյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Վարդգես Գեւորգյանի, Մանվել Աթոյանի, Աշոտ Պետրոսյանի, նաեւ՝ Կարո Եղնուկյանի եւ Խաչատուր Գիչյանի գործով հերթական դատական նիստում այսօր դատավոր Արտուշ Գաբրիելյանն անդրադարձավ ամբաստանյալների կողմից իրեն ուղղված գրություններին, որոնցով վերջիններս մի շարք խնդիրներ են մատնանշել:

Ամբաստանյալներից Աշոտ Պետրոսյանը, որը գեղանկարիչ է, մասնավորապես նշել է՝ ՔԿՀ-ում իրեն արգելում են տրամադրել անհրաժեշտ նկարչական պարագաներ, այդ թվում՝ յուղաներկեր:

Արտուշ Գաբրիելյանը պարզաբանեց. «Իմ տեղեկություններով՝ Ձեզ տրամադրել են վրձիններ ու մատիտներ, իսկ յուղաներկն արգելված իր է համարվում, քանի որ այրվող նյութ է, ուստի այն չի կարող խուց տարվել»:

Աշոտ Պետրոսյանը պնդեց՝ դատավորին ստել են, իրեն մատիտներ չեն տրամադրել. «Գունավոր՝ տոնային թղթեր կան, որոնք եւս արգելում են: Մոմամատիտներ կան, որոնք եւս չեն թույլատրում»:

Ամբաստանյալը հավելեց, որ ստիպված միայն սեւ մատիտով է ստեղծագործում, բացի այդ, ՔԿՀ-ն արգելել է նրան տրամադրել նաեւ տախտակ, որի վրա դրվում է թուղթը:

Արտուշ Գաբրիելյանը խոստացավ դիմել ՔԿՀ-ի ղեկավարությանը եւ կրկին հետաքրքրվել խնդրով:

Լուիզա ՍՈՒՔԻԱՍՅԱՆ